Aýyl halqy úshin emhana esiginiń ashyq turýy dátke qýat sanalady. Turǵylyqty halyqtyń densaýlyǵyn qadaǵalap, aýyryp-syrqaǵanǵa der kezinde dárigerlik kómek qolyn sozatyn da – medısına mamandary.
Halyq sany eki myńǵa jýyqtaıtyn Aqaı Núsipbekov atyndaǵy aýylda byltyr jańa dárigerlik ambýlatorııanyń qurylys jumystary bastalǵan edi. Jalpy aýmaǵy 320 sharshy metr ǵımarattyń qurylys jumysyn júrgizgen merdiger «Alaý» JShS nysandy osy jyldyń tamyz aıynyń sońynda paıdalanýǵa berýdi josparlaǵan. Ýáde oryndalyp, Konstıtýsııa kúni qarsańynda sapaly etip salynǵan aýyldyq ambýlatorııanyń ashylý rásimi saltanatty túrde ótti.
Bul qýanyshty is-sharaǵa aýyldyń eńbektegen balasynan eńkeıgen qartyna deıin qatysyp, biter istiń basy-qasynda júrgen isker azamattarǵa qoshemet kórsetti. Jaqsyny kórmekke kelgen aýyl jurtshylyǵyn Kegen aýdanynyń ákimi Nurbaqyt Teńizbaev quttyqtap, denderine saýlyq, otbasylaryna amandyq tiledi. Sondaı-aq medısına mamandarynyń óz isterine yjdaǵatty bolýyn tapsyrdy.
Aýyl kórkin kirgizgen jańa ambýlatorııa shtatynda 2 dáriger, 5 orta býyn, 2 kishi býyn, 2 tehnıkalyq qyzmetker jumysyn bastap ketti. Medısınalyq mekeme stomatologııalyq qurylǵymen, zerthanalyq, fızıoterapııalyq jáne EKG apparattarymen jabdyqtalǵan. Emdeý ornynda ambýlatorııalyq qyzmetten bólek jaraqat tańý pýnktin, shuǵyl medısınalyq kómek kórsetý kabınetterin ashý josparlanyp otyr.
Keıingi úsh jylda aýdandyq aýrýhana ǵımaraty, Jalańash, Toǵyzbulaq dárigerlik ambýlatorııalary kúrdeli jóndeýden ótse, Tasashy dárigerlik ambýlatorııasyna aǵymdaǵy jóndeý jumysy júrgizildi. Alǵabas dárigerlik ambýlatorııasy ǵımaratynyń kúrdeli jóndeý jumystary aıaqtalýǵa jaqyn. Sonymen qatar Bóleksaz, Tuıyq, Shybyshy, Jalaýly aýyldarynda blokty modýldi ǵımarattan emdeý mekemeleri boı kóterip, el ıgiligine berildi.
Memleket basshysynyń Jarlyǵy boıynsha jańǵyrtý negizinde Jylysaı, Jaıdaqbulaq, Qarabulaq, Kúrmeti, Taldy, Jańatalap sekildi eldi mekenderge jańa ǵımarattar salý josparlanýda, bul jumystar bıyl bastalady.
«Densaýlyq – zor baılyq», dep beker aıtpasa kerek. Adam densaýlyǵy qoǵamnyń eń myzǵymas berik qamaly desek bolady. Osy jolda aq jeleńdi abzal jandar aıanbaı eńbek etedi degen senim mol. Paıdalanýǵa berilgen Aqaı Núsipbekov aýylyndaǵy dárigerlik ambýlatorııanyń el erteńine bereri zor. Aýyl turǵyndary úshin de densaýlyq saqtaý nysanynyń jańalanyp, zamanǵa saı jasaqtalýy úlken oljamen teń ekeninde daý joq», deıdi aýdandyq aýrýhananyń dırektory Almas Tileýlıev.
Alqyzyl lentasy qıylyp, shashý shashylǵan is-sharada aýyldyń aqsaqaldar alqasynyń tóraǵasy Serik Uzaqov aq batasyn berdi. Jıyn sońynda óz isinde tabandylyq tanytyp kele jatqan birqatar medısına mamany aýdan ákiminiń Alǵyshatymen marapattaldy.
Almaty oblysy,
Kegen aýdany