«Amanat» partııasy fraksııasynyń múshesi Qaırat Balabıev Ekologııa jáne tabıǵı resýrstar mınıstrine, sondaı-aq Sý resýrstary jáne ırrıgasııa mınıstrine, Bas prokýrorǵa Túrkistan oblysynyń sý qorǵaý aımaqtary men ózen beldeýleriniń jer qoınaýyn paıdalaný týraly depýtattyq saýal joldady, dep habarlaıdy Egemen.kz.
Prezıdent bıylǵy Joldaýynda sý resýrsy elimizde ózekti máseleniń biri ekenin aıtty, sonymen qatar transshekaralyq sý kózderine táýeldi el ekenimizdi ári sý únemdelmese, tez taýsylatyn shekteýli resýrs ekendigin eskertti, sol sebepti bul salada zańsyzdyqqa jol berilmeıtinin atap ótkeni málim.
«Túrkistan óńirinde 60-qa jýyq ózen bar. Syrdarııa - transshekaralyq respýblıkalyq mańyzy bar strategııalyq ózen. О́zenderdiń qorshaǵan ortaǵa baılanysty máseleleri «Amanat» partııasynyń baqylaýynda. Alaıda, elimizdiń ózenderiniń mańyzdylyǵyna mán berip, qaýiptiligin eskermeıtin kásipkerler belgilengen sý qorǵaý aımaqtary men beldeýine kirip, qum men tas jáne ózge de paıdaly qazbalardy óndirýmen tabıǵatqa orasan zııan keltirip otyr. Ruqsatsyz qazba jumystarynan zardap shekken Syrdarııa jáne basqa da ózenderdiń arnasy buzylyp, olardyń sýy tartylyp barady. Elimizge sý resýrstarynyń 51 paıyzy kórshi elderden keletinin de umytpaýymyz kerek», dedi depýtat.
«Amanat» partııasy fraksııasynyń múshesi Q.Balabıevtiń aıtýynsha, ruqsatsyz qazba jumystary kesirinen Syrdarııa, Arys ózenderi jaǵalaýlarynda 70 gektarǵa deıin qazylǵan jerler bar. Al Aqsý ózeniniń tabanynan tas alý kezinde 40 metr tereńdikke qazylǵan. Ǵaryshtyq monıtorıng ádisterin qoldaný kezinde ózender jaǵalaýynda atalǵan ózgeristerdiń oryn alǵany anyqtalǵan.
«О́ńirdegi basqa ózender de osyndaı aýyr jaǵdaıda bolǵandyqtan quzyrly organdardyń aralasýyn qajet etedi. Qazba jumystary osy qarqynda jalǵasatyn bolsa, sý qumǵa sińip, jaqyn bolashaqta sýsyz qalý qaýpi bar», dep dabyl qaqty depýtat.
Depýtattyń aıtýynsha, mundaı zańsyz áreketterge baılanysty «karerlerdiń jumysy nelikten betimen ketken» degen mazmundy suraq týyndaıdy. Árbir memlekettik organ óz mindetin durys atqaratyn bolsa, birde-bir zańsyz karer bolmas edi. Olarǵa tosqaýyl qoıyp, ruqsatsyz áreketterin birjolata toqtatý kerek.
«Syrdarııa jáne basqa da ózenderge ekologııalyq apatqa ushyraý qaýpi tóngenin eskerip, Túrkistan óńirindegi ózenderdiń Zańmen belgilengen sý qorǵaý aımaqtary men beldeýlerinde qazba jumystarymen aınalysyp jatqan kásipkerler qyzmetiniń zańdylyǵyn tekserip, anyqtalǵan zań buzýshylyqtarǵa qatań prokýrorlyq sharalardy qoldanýdy, qazba jumystaryn júrgizýshi kásipkerler tarapynan sý jáne ekologııa kodeksterinde kórsetilgen zańdardyń oryndalýyn jáne sý qorǵaý aımaqtary men beldeýlerin belgileý erejeleriniń saqtalýyn qatań baqylaýǵa alýdy suraımyn», dep túıindedi Qaırat Balabıev.