Buǵan deıin jazǵanymyzdaı, bıyl Almaty qalasynda 30 myńnan asa bala mektep tabaldyryǵyn alǵash ret attady. Olardyń ishinde 3 789 bala jekemenshik mektepte bilim almaq. Al qalanyń Túrksib aýdanyndaǵy Qaırat shaǵyn aýdanynda ashylǵan №211 memlekettik mektep-gımnazııa balalarǵa baǵdarly bilim berýge baǵyttalyp otyr.
Pándik kabınettermen, zerthanalarmen jaraqtalǵan zamanaýı mektep 1500 balanyń sapaly bilim alýyna laıyqtalǵan. Jaratylystaný, matematıka jáne aǵylshyn tilin tereńdetýge negizdelgen bilim ordasynda tehnologııa páni boıynsha er balalar aǵash óńdeý, qysh buıymdar jasaý isine mashyqtansa, qyzdar tigin tigip, aspazdyqty ıgeredi.
Almaty qalalyq bilim basqarmasynyń málimetinshe, «Jaıly mektep» jobasy aıasynda bul aýdanda taǵy 4 mektep salynady. Búginde Almaty qalasy mektepterindegi oryn jetispeýshiligi 27 500-di quraıdy. О́tken jyly 17 bilim nysany iske qosylsa, bıyl jańa 12 bilim berý oshaǵy balalardy qabyldady. Onyń 9-y – jekemenshik, 2-i – qosymsha ǵımarat. Jyl sońyna deıin taǵy 2 qosymsha ǵımaratty iske qosý kózdelgen.
Orta bilim berý uıymdarynda pándik kabınetterdiń 75,6 paıyzy jańartyldy. Mektepterde barlyǵy 847 pándik kabınet (hımııa, fızıka, bıologııa), onyń ishinde 640 kabınet zamanaýı jabdyqtarmen (jańa modıfıkasııamen) jaraqtandyryldy. Sonymen qatar 75 STEM jáne robottehnıka kabınetteri satyp alyndy. Buǵan qosa jan basyna shaqqandaǵy qarjylandyrý aıasynda taǵy 147 kabınet, ıaǵnı 34 hımııa, 31 fızıka, 39 bıologııa, 23 STEAM jáne 20 robottehnıka kabıneti jaraqtalǵan. Bul balalardyń jaratylystaný-matematıkalyq sıkldik pánder boıynsha bilim alýyna keń múmkindik beredi.
Jańa oqý jylynda qaladaǵy 323 mektep balalardy qabyldaǵan. Onyń 215-i – memlekettik, 108-i – jekemenshik. Bıyl jergilikti bıýdjetten qarjylandyrylatyn «Jalpyǵa birdeı oqytý» qorynan mektep formasy men keńse kerek-jaraqtaryn satyp alý úshin bir balaǵa 43 myń teńgeden berilip, osy qordan halyqtyń áleýmettik osal sanatyna jatatyn 15 myńnan asa almatylyq oqýshyǵa kómek kórsetilgen.
ALMATY