Qaırat Boranbaev quny 90 mlrd teńgeden asatyn aktıvterdi memleketke qaıtardy. Bul týraly Qarjylyq monıtorıng agenttigi habarlady, dep jazady Egemen.kz.
Agenttik Qaırat Boranbaevqa qatysty qylmystyq jolmen alynǵan múlikti zańdastyrýǵa baılanysty sotqa deıingi tergeýdi jalǵastyryp jatyr.
«Tergeý barysynda jalpy quny 90 mlrd teńgeden asatyn aktıvterdi, onyń ishinde munaı ken ornyn, gaz taratý kompanııasyn, servıs salasyndaǵy kásiporyndy, qonaq úı jáne saýda-oıyn-saýyq keshenderin, fıtnes ortalyqtar jelisin, keńse úı-jaılaryn jáne basqa da aktıvterdi memleket menshigine erikti túrde qaıtarý jóninde sharalar qabyldandy. Sondaı-aq Qaırat Boranbaev Bilim berý ınfraqurylymyn qoldaý qoryna 30 mlrd teńge aýdardy», delingen habarlamada.
Atalǵan obektilerdiń barlyǵy memlekettik organdar men kompanııalardyń balansyna beriledi, al aqshalaı qarajat bilim berý ınfraqurylymyn damytý úshin paıdalanylady.