Qaırat Boranbaevtyń jazasyn óteý merzimi 8 jyldan 6 jylǵa qysqardy, dep habarlaıdy Egemen.kz.
Astana qalasynyń prokýratýrasy Q.Boranbaevpen jáne basqa sottalýshylarmen «QazTransGaz» AQ-nyń aqshalaı qarajatyn ıemdenip (QK 189-babynyń 4-bóligi) jáne olardy zańdastyrýǵa (QK 218-babynyń 3-bóligi) qatysty isi boıynsha kináni moıyndaý týraly mámile nysanynda prosestik kelisim jasaǵan bolatyn.
Sottalýshylar kinálaryn tolyq moıyndaýyn jáne 14,5 mlrd teńgeniń zalalyn ótegenin eskerip, jábirlenýshi taraptardyń kelisimimen qala prokýratýrasy prosestik kelisim jasaý týraly sheshim qabyldady.
Sot osy kelisimge sáıkes sheshim shyǵardy. Qaırat Boranbaev 6 jylǵa sottaldy.
Eske sala ketsek, bıyl naýryzda Saryarqa aýdandyq №2 soty Qaırat Boranbaevty 8 jylǵa bas bostandyǵynan aıyrý jazasyna kesken edi. Alaıda keıin Astananyń sot alqasy Boranbaevqa shyqqan sot úkiminiń kúshin joıdy.
29 maýsymda Astana qalalyq qylmystyq ister jónindegi sot alqasy Boranbaevpen birge sottalǵan Taıyr Januzaq pen Roman Nahanovtyń da úkimin ózgertip, qaıta qaraý týraly sheshim shyǵardy. Úkim kúshiniń joıylýyna naqty aıǵaqtyń bolmaýy sebep bolǵan.
Aıta keteıik, Qaırat Boranbaev memlekettik qyzmette, jergilikti ózin-ózi basqarý organdarynda jáne kvazımemlekettik sektorda laýazymdy qyzmetti atqarý quqyǵynan aıyryldy.