Almatyda «Aq Jelken» balalar men jasóspirimderdiń respýblıkalyq jýrnalynyń jas tilshilerine arnalǵan belgili jýrnalıst, «Aq Jelken» -niń bas redaktory Eseı Jeńisulynyń «Saýatty jazý: alǵysharttar jáne qatemen jumys» atty semınar-sabaǵy ótti, dep habarlaıdy Egemen.kz.
Atalǵan sabaqqa ál-Farabı atyndaǵy Qazaq Ulttyq ýnıversıteti (ál-Farabı atyndaǵy QazUÝ), Halyqaralyq aqparattyq tehnologııalar ýnıversıteti (HATÝ) men Abylaı han atyndaǵy Qazaq Halyqaralyq Qatynastar jáne Álem Tilderi ýnıversıteti (Abylaı han atyndaǵy QHQ jáne ÁTÝ) syndy Almatydaǵy iri oqý oryndarynyń jýrnalıstıka fakýltetiniń stýdentteri qatysty.
Sabaqtyń maqsaty – jýrnalıstıka salasyna aıaq basqan tilshilerdiń saýatty jazýyna, jazý sheberligin qalyptastyrýǵa baǵyt-baǵdar berip, jas býyn arqyly BAQ tilin jandandyrý. Sabaqqa qatysýshylar Eseı Jeńisuly usynǵan tapsyrmalardy oryndap, nebári 7 mınýtta zametka janrynda materıal jazyp shyqty.
Bas redaktor ár tilshiniń materıalyn taldaı otyra, BAQ tiliniń, ǵylym tiliniń kalkalanyp bara jatqanyn túsindirip, qatemen jumys júrgizdi. «Qazaq tili qalanyń tili bolmaı, óspeımiz! Qalanyń tili degen ne? Qalanyń tili degenimiz – ǵylymnyń tili» dep, tájirıbeli jýrnalıst stýdentterdi saýatty jazýǵa shaqyrdy.
Aısulý SEZHAN,
tilshi