Almaty oblysynda balyq sharýashylyǵyn damytý maqsatynda Ile aýdany Baıserke aýyldyq okrýgine qarasty «Asanov Club» jaýapkershiligi shekteýli seriktestigi bekire balyqtarynyń asa qundy túrlerin, atap aıtsaq, qurtpa, qarysh jáne sibir bekiresin alyp keldi. Quny qymbat balyqtyń bul túrin Qaraǵandy oblysyndaǵy bekire ósirý zaýytynan aldyrǵan. Igilikti sharaǵa Balqash – Alakól oblysaralyq basseındik balyq sharýashylyǵy ınspeksııasynyń orynbasary Nurbolat Narjanov, Almaty oblysynyń tabıǵı resýrstar jáne tabıǵatty paıdalanýdy retteý basqarmasynyń basshysy Aıdar Maǵzumov arnaıy qatysty.
«Keshenimiz taýarlyq balyq sharýashylyǵyn qolǵa alǵanyna bir jylǵa jýyq ýaqyt ótti. Bul asyl tuqymdy balyqtarymyz jyl boıy jabyq sýmen qamtamasyz etý júıesi bar jasandy toǵanymyzda ósetin bolady. Barlyǵy zamanaýı tehnologııamen jabdyqtalǵan. Bekire tuqymdas balyqtardy ósirýge jáne ustaýǵa ony kóbeıtýge óte qolaıly. Búgingi jańadan kelgen analyq bekirelerimizdi ósirip, onyń ýyldyryǵyn alyp, bizdiń klımatymyzǵa laıyqty jaǵdaıǵa jetkizemiz. Bul úderistiń ózi 4-5 jyldyń kóleminde júrgiziledi. Osy baǵytta aýdanymyzdy ǵana emes, alys-jaqyn shetelderge de eksporttaıtyn bolamyz», deıdi «Asanov Club» JShS-nyń dırektory Edýard Antonenko.
Balyq kesheni ýyldyryqty uzaq jyldar boıy alýdyń kúrdeli tehnologııasyn ıgerýimen erekshelenedi. On jyldyń kóleminde úzdiksiz ómir súre beretin bolady.
Búgingi kúni balyq sharýashylyǵyn damytýdy memlekettik qoldaý maqsatynda jergilikti bıýdjetten 2022 jylǵa sýbsıdııalaýǵa 70,0 mln teńge bólindi. Bul soma «Qoldau» portalynda berilgen 17 ótinim boıynsha ıgerildi. 2023 jylǵa jergilikti bıýdjetten osy maqsattarǵa sýbsıdııalar kólemi eki esege ulǵaıyp, 150,0 mln teńgege deıin ınvestısııalyq shyǵyndardy óteýge respýblıkalyq bıýdjetten 436,7 mln teńge bólingeni týraly Almaty oblystyq tabıǵı resýrstar basqarmasynyń basshysy Aıdar Maǵzumov habardar etti.
«Osy jyldyń 14 maýsymynda Almaty oblysy ákimdiginiń «2023 jylǵa arnalǵan akvaósirý (balyq ósirý sharýashylyǵy) óniminiń ónimdiligi men sapasyn arttyrýdy, sondaı-aq asyl tuqymdy balyq ósirýdi damytýdy sýbsıdııalaý kólemderin bekitý týraly» №179 qaýlysy shyǵyp, búgingi kúnge «Kezekte» aqparattyq júıeler platformasyndaǵy «Balyqsy» servısi arqyly 138 971 469 teńge somasyna 30 ótinim tólendi, 1 ótinim qaraý satysynda jáne ınvestısııalyq shyǵyndardy óteýge 14 ótinim berildi. Qazirgi ýaqytta ótinimder qaralyp jatyr», dedi basqarma basshysy Aıdar Maǵzumov.
«Asanov Club» toǵan sharýashylyǵy alǵashqy balyq aýlaýdy byltyrǵy jyldyń qyrkúıeginde júzege asyryp, balyq ınspeksııasymen birlesip «Balyq ósirý – bıologııalyq negizdemesi» atty joba jasalyp, toǵandar paıdalanýǵa berilgen. Qazir 2 gektar jerde 3 toǵan jumys isteýde.
Seriktestik dırektory Edýard Antonenkonyń málimdeýinshe, bul óńirdegi bekire tuqymdas balyq túrlerin ósirýmen aınalysatyn jalǵyz toǵan, onda 19 tonna balyq bar eken.
Elimizde balyq sharýashylyǵyn damytýdyń 2021-2030 jyldarǵa arnalǵan baǵdarlamasyna sáıkes, Almaty oblysy boıynsha negizgi nysanaly ındıkatorlar 2030 jylǵa qaraı akvaósirý óndirisin 3,7 myń tonnadan 20 myń tonnaǵa deıin jetkizýge qamdanyp otyr. 2023 jyly taýarly balyq ósirý jospary 5 568 tonnaǵa josparlandy. Almaty oblysynda 2026 jylǵa qaraı 329 jańa jumys ornyn qurý arqyly jalpy quny 80,6 mlrd teńgeni quraıtyn, jalpy qýattylyǵy 16,3 myń tonna taýarlyq balyq quraıtyn 10 jobany iske asyrý josparlanýda.
Almaty oblysy