Senator Serik Shaıdarovtyń tóraǵalyǵymen Aqmola oblysynyń Rodına aýylynda «О́ńir» depýtattyq tobynyń kóshpeli otyrysy ótti, dep habarlaıdy Egemen.kz.
Senatorlar sapar barysynda birqatar áleýmettik nysandardy aralady. Sondaı-aq «Rodına» agrofırmasy» JShS basshylyǵymen kezdesip, óńirlerdi damytýǵa qatysty birqatar máselelerdi talqylady. Shara barysynda jer zańnamasy men ınfraqurylymnyń problemalyq máseleleri talqylandy. Serik Shaıdarov óz sózinde elimiz Prezıdentiniń óńirler men aýyl sharýashylyǵyn damytý salasy boıynsha alǵa qoıǵan mindetteri týraly aıtty jáne Memleket basshysynyń bastamalaryn zańnamalyq qoldaý jónindegi senatorlardyń qajyrly qyzmeti týraly atap ótti.
«Aýyl turǵyndarynyń ómir súrý jaǵdaıyn jaqsartý maqsatynda eń birinshi turaqty jumys oryndarymen qamtamasyz etý mindeti tur. Memleket basshysy bıylǵy Joldaýynda aıtqandaı aýylsharýashylyq ónimderin óńdeýdi 70 paıyzǵa jetkizý qajet. Bul eldiń aýylsharýashylyq ónimderin eksportyn arttyryp, azyq-túlikke ishki suranysty tolyqqandy qamtamasyz etýge jol ashady. Depýtattar osy naqty mindetti oryndaý jáne adamdardy ónimdi qaıta óńdeýge yntalandyrý úshin tıisti zańnamalyq ózgeristerge usynystar daıyndap jatyr», dedi senator Shaıdarov.
Kóshpeli otyrys jumysyna Ulttyq ekonomıka, Aýyl sharýashylyǵy, Sıfrlyq damý, Eńbek jáne Sý resýrstary mınıstrlikteriniń, sondaı-aq óńirdiń salalyq sarapshylary men bıznes qaýymdastyǵynyń ókilderi qatysty.