Memleket basshysy sanksııalyq teketiresterdi aıyptap, shekteýsiz jáne kedergisiz saýda-sattyqty jaqtady. Bul týraly Qasym-Jomart Toqaev Ortalyq Azııa memleketteri basshylarynyń Germanııa Kansleri Olaf Sholspen kezdesýinde aıtty, dep habarlaıdy Egemen.kz Aqordanyń baspasóz qyzmetine silteme jasap.
«Qazaqstan sanksııalyq teketiresterge qarsy. О́ıtkeni saıası turǵyda negizdelgen shekteýler halyqaralyq qatynastardaǵy jalpy ahýalǵa syzat túsiredi jáne memleketter arasyndaǵy saýda-ekonomıkalyq yntymaqtastyqtyń damýyna keri áser etedi. Sonymen birge biz aımaqtyq saıasattaǵy sanksııalyq shekteýlerdi eskerýge májbúrmiz. Beıbitshilik pen yntymaqtastyqtyń ózara tıimdi formýlasyn tabý úshin syndarly dıplomatııanyń ýaqyty keldi dep sanaımyz. Men bul týraly jýyrda ótken BUU Bas Assambleıasy sessııasynyń minberinde sóılegen sózimde aıttym. Qazaqstan barlyq múddeli memleketpen aradaǵy kedergisiz saýdany damytýdy jáne ınvestısııalyq yntymaqtastyq ornatýdy jaqtaıdy. Qurmetti Kansler, keshe ekonomıkalyq yntymaqtastyq máseleleri jóninde Sizben jáne Germanııanyń jetekshi kompanııalarynyń basshylarymen tabysty kelissóz júrgizdim. Mundaı yqpaldastyqtyń keleshegi jarqyn bolady dep sanaımyn», dedi Qasym-Jomart Toqaev.
Qazaqstan Prezıdenti aýyl sharýashylyǵyn kelesi basym baǵyt retinde atap ótti. Memleket basshysy germanııalyq seriktesterdiń qoldaýymen Qazaqstanda Ornyqty eginshiliktiń aımaqtyq ortalyǵyn qurýdy usyndy.
Onyń aıtýynsha, atalǵan ortalyq teorııalyq ázirlemeler boıynsha tájirıbe almasýǵa, sondaı-aq olardy qoldanysqa engizýge jáne kommersııalandyrýǵa septigin tıgize alar edi.