5-6 qazan kúnderi elordada «Nobel Fest: Sıfrlyq Apgreıd» halyqaralyq Nobel festıvali ótedi. Alqaly basqosýǵa Nobel syılyǵynyń laýreattary, ǵylym, aqparattyq tehnologııalar, ekonomıka jáne ınnovasııalar salasyndaǵy álemdik jetekshi sarapshylar qatysady, dep habarlaıdy Egemen.kz.
Festıval barysynda otandyq jáne sheteldik mamandar ǵylymı-tehnıkalyq progrestiń eń ozyq teorııalary men tájirıbesin jan-jaqty taldaıdy dep josparlanyp otyr.
Sondaı-aq basqosýda jasandy ıntellekt, klımattyń ózgerýi, ekonomıka bolashaǵy, startaptar men zamanaýı eńbek naryǵy, ǵylymnyń jańa qyrlary, adamzat bolashaǵy syndy ózekti máseleler ortaǵa salynady.
Festıvalde QR Ǵylym jáne joǵary bilim mınıstri Saıasat Nurbek, ekonomıka boıynsha Nobel syılyǵynyń laýreaty, álemniń úsh úzdik ekonomısiniń biri Djeıms Hekman, Beıbitshilik salasyndaǵy Nobel syılyǵynyń ıegeri, klımat jáne turaqty damý boıynsha №1 sarapshy Rae Kvon Chýng, M. Áýezov atyndaǵy Ońtústik Qazaqstan ýnıversıtetiniń Basqarma tóraǵasy – Rektor Darııa Qojamjarova, álemge áıgili fýtýrolog Gerd Leongard, 2022 jyly ómir týraly ǵylym salasyndaǵy serpilis úshin álemdik syılyq ıegeri Paskal Maıer, jáne taǵy da basqa túrli salanyń bilikti mamandary qatysady.
Nobel Fest – halyqaralyq EdTech platformasy. Festıvaldiń basty maqsaty – myńdaǵan qazaqstandyqtardy bilimge, ǵylymǵa jáne ınnovasııaǵa baýlý. Nobel Fest jyl saıyn 100 elden 500 000 qatysýshy men 500 ýnıversıtetti biriktirip, uzaq merzimdi damý men jaqsy bolashaqty qalyptastyrýdaǵy bilim men jan-jaqty bilimniń róli týraly habar taratady.
Festıvaldiń negizgi taqyryptary:
Tehnologııalyq sıngýlıarlyq dáýiri; Belgisiz álem: jasandy ıntellekt dáýiri; Sıfrlyq álemdegi adam mıynyń resýrstary: sıngýlıarlyq nemese sana jolynda; Kópplanetalyq órkenıet pen ǵarysh týrızminiń qurylysy; Ǵylym men bilim damýynyń jańa qyrlary; Jahandanýdyń aıaqtalýy jáne álemniń jańa ekonomıkasy; «Unicorn» startapty qalaı qurýǵa bolady ne tehnologııa alpaýyttarynyń damýyna qandaı jaǵdaı jasaý kerek? Eńbek pen adamı kapıtaldyń bolashaǵy.