Mýzyka – búkil álem halqyn baılanystyratyn ortaq til. Túrki órkenıetiniń ózine tán mýzykalyq dástúri qalyptasqan. Onyń kúshtiligi sol, búginniń ózinde mıllıondaǵan adam ony tyńdaǵanda, kóńili tolqyp, erekshe áser alady. Munyń aıqyn kórinisi – eń kóne mýzykalyq aspap qobyz ben dombyranyń úni.
Ultymyzdyń rýhanı ıgiligi HH ǵasyrǵa deıin jazbasyz túrde damyp, aýyzdan-aýyzǵa ata-babanyń mura etýimen kúni búginge deıin jetti. Biz osy myńjyldyqtar boıy jibi úzilmegen ulttyq qundylyqtarymyzdy, ásirese, qazaqtyń mýzykalyq mádenıetin saqtaýymyz kerek. Bul – bizdiń ulttyq kodymyz. Boıdaǵy alpys eki tamyrdyń bastaýy.
Álemde saıası ahýal kúrdelene túskende, «Otandastar» forýmynyń joǵary deńgeıde ótkenin aıtpasqa bolmaıdy. Bul birinshiden, tól mádenı murany, rýhanı sanany jańǵyrtý jolynda atqarylǵan ıgi is boldy. Ekinshiden, jahannyń túkpir-túkpirinde túrli salada qyzmet etken qandastardyń basyn qosyp, irgeli eldik máselelerdi talqylaýǵa múmkindik jasady.
Shyǵarmashylyq adamnyń mindeti – pendeniń rýhanııatyn nyǵaıtýǵa sep bolý. Osy rette tájirıbem kórsetkendeı, jas talanttardy joǵary deńgeıde qoldaý qajet. Búginde bul baǵyttaǵy jumystardyń júıeli iske asyrylýynyń arqasynda, álemdik arenada Qazaqstan saıası, ekonomıkalyq turǵyda ǵana emes, kıno, mýzyka syndy salalarda da belsendiligin arttyrdy.
Baıǵalı SERKEBAEV,
Qazaqstannyń eńbek sińirgen qaıratkeri, «A-Studio» tobynyń prodıýseri