IIM-de «Dınamo» dene shynyqtyrý jáne sport qoǵamy» qoǵamdyq birlestigi tóralqasynyń otyrysy ótip, jıynda sporttyq qoǵamdastyq músheleriniń biraýyzdan qabyldaǵan sheshimimen Ishki ister mınıstri Erjan Sadenov «Dınamo» qoǵamdyq birlestiginiń tóraǵasy bolyp saılandy, dep habarlaıdy Egemen.kz IIM baspasóz qyzmetine silteme jasap.
«IIM jáne «Dınamo» spartakıadalarynyń tanymaldyǵy jyl saıyn artyp keledi. Buǵan sport túrleri boıynsha saıysqa qatysýshylar sanynyń artýy dálel. Bıyl halyqaralyq jarystarda «Dınamo» tárbıelenýshileri 100-den astam medal jeńip aldy. Máselen, jazǵy Azııa oıyndarynda otandastarymyz jeńip alǵan 80 júldeniń 43-i «Dınamo» sportshylaryna tıesili. 10 altyn júlde bizdiń sportshylarymyzdyń qorjynynda», dedi «Dınamo» sport qoǵamy tóraǵasynyń birinshi orynbasary Asqar Omarqulov.
Tóralqa músheleri jumysty qorytyndylap qana qoımaı, aldaǵy kezeńge arnalǵan negizgi mindetterdi aıqyndady. Erjan Sadenov óńirlerdegi polısııa departamentteriniń bastyqtaryna «Dınamo» fılıaldarymen birlesip, buqaralyq sportty damytýǵa belsendi qatysýdy tapsyrdy.
«Uıym maqsaty sportta jetistikke jetý ǵana emes, sonymen qatar balalar qylmysynyń aldyn alý bolyp tabylady. Sport – qylmys pen quqyq buzýshylyqtyń aldyn alýdaǵy negizgi quraldardyń biri. Balalar men jasóspirimderge arnalǵan seksııalardy kóbeıtý qajet. О́skeleń urpaqtyń sportqa degen qyzyǵýshylyǵyn oıatyp, qamqorlyǵymyzǵa alý arqyly balalardyń tulǵa retinde qalyptasýyna múmkindik beremiz», dep atap ótti mınıstr.
«Dınamo» uıymynda 102 eńbek sińirgen sport sheberi, 253 halyqaralyq dárejedegi sport sheberi jáne 574 QR sport sheberi daıyndalǵan. Elimizdegi ulttyq qurama músheleriniń 80%-yn osy sport qoǵamynyń ókilderi quraıdy.