Qazaq jastary medısınalyq dıagnostıka jasaıtyn joba jasap shyǵardy. Bul startap Dýbaı qorynan 250 myń dollar ınvestısııa tartty.
Toty Smatova 2021 jyldyń jeltoqsanynda «CheckDoc» startapyn júzege asyrdy. Sıfrlyq zerthana úıde dıagnostıka júrgizýge múmkindik beredi. Jedel medısınalyq servıs árbir klıentti sapaly tekserýden ótkizip, aýrýdy erte kezeńde anyqtaıdy. Jas ujym emdi sapaly ári qoljetimdi etkisi kelgen. Medbıkeler tutynýshylardyń úıine baryp, analızderge bıomaterıal jınaıdy nemese PTR testin jasaıdy. Sodan keıin ony zerthanaǵa aparady, onda zertteýler júrgiziledi. Nátıjeler saıttaǵy qoldanýshynyń jeke profıline jiberiledi.
«Astana Hub» halyqaralyq tehnoparkiniń qatysýshysy – CheckDoc startapyna «Almak Capital» Dýbaı qory ınvestısııa quıǵan. Qarjylandyrý qyzmeti tehnologııalyq bólikti damytýdy jáne naryqtaǵy ósýdi jedeldetedi.
«Bizdiń dástúrli zerthanalardan aıyrmashylyǵymyz ben artyqshylyǵymyz – tehnologııalyq DNQ, tapsyrys jáne kelý úderisin óńdeý jyldamdyǵynda. Tapsyrys bergen sátten bastap ony júzege asyrýǵa deıin 40-60 mınýt ótedi. Biz medısınalyq dıagnostıkanyń Airbnb-i sııaqtymyz. Bizdiń kúshimiz – klıentke ne qajet ekenin bilemiz jáne qalaı baılanysý kerektigin túsinemiz», deıdi T.Smatova.
Otandyq dıagnostıka qyzmetiniń qazirgi maqsaty – dıagnostıkaǵa basymdyq beretin №1 medısınalyq qyzmetke aınalý. Osy kezeńde olar jasandy ıntellekt kómegimen jobanyń IT quramdas bóligin kúsheıtýge jumys istep jatyr. Aldaǵy ýaqytta jergilikti dıagnostıka naryǵynyń 15 paıyzyn qamtýdy josparlap otyr. T.Smatova ult densaýlyǵyna óz úlesin qosyp, halyqtyń halin jaqsartyp, turmysyn túzegisi keledi. Ol ınvestorlar jobamyzǵa qoldaý bildirse, shetelderge de jol ashylar edi deıdi.
«Jahandyq sıfrlyq densaýlyq saqtaý naryǵy jyl saıyn ósip keledi. Tek keıingi úsh jylda bul eki esege jýyq ósti. Aıtalyq, 2020 jylǵy 216 mlrd dollardan 2023 jyly 417 mlrd dollarǵa deıin ulǵaıdy. Biz sıfrlyq densaýlyq saqtaý jobalarynyń bolashaqta tabysy artady dep oılaımyz. CheckDoc – turaqty qarjylyq modeli bar startap. Kompanııa tek oń dınamıka kórsetip keledi. Sondyqtan biz kompanııanyń jańa naryqtarǵa shyǵýyna múmkindik berip, startaptyń tehnologııalyq jaǵyn jetildirý úshin ınvestısııa quıdyq», deıdi Almak Capital basqarýshy seriktesi Oljas О́kenov.
Osydan biraz jyl buryn kásipker T.Smatovanyń enesi qaterli isikke shaldyǵady. Bul dertten arylý úshin otbasy Ispanııaǵa kóship, sol jaqta operasııa jasatady. Operasııadan keıin apta saıyn emhanaǵa barý qajet bolǵandyqtan, qalypqa kelýge uzaq ýaqyt ketken. О́zi aýrýdan jany qınalyp turǵan adamdy jol ábden tıtyqtatyp tastaıtyny ras. Bul naýqasqa óte úlken kúızelis ákeledi. Sonda Toty nege medısınalyq qyzmetkerler ózderi pasıentterdiń úıine barmaıdy dep oılana bastaıdy. Osy ıdeıamen elge oralyp, Astanada SheckDoc kóshpeli dıagnostıka servısin qurady.
Jobanyń alǵashqy qadamdary 2021 jyldyń jazynda jasala bastaıdy. Ol dárigerlermen sóılesip, júıeniń mán-jaıyn zertteıdi. Mamandar medısınanyń 70 paıyzy dıagnostıkadan turatynyn aıtqanda, bıomaterıaldardy jınaýǵa suranys árqashan bolatynyn túsingen. Jobany júzege asyrýǵa bilikti qyzmetker tabý da qıynǵa soqpapty. Sebebi jobanyń jańashyldyǵy men janashyrlyǵy jaqsy mamandardy ózi-aq tartqan.
«Alǵashynda medbıkelerdi jaldaýda eshqandaı másele bolǵan joq. Biz jobany endi ǵana bastaǵanymyzǵa qaramastan, adamdar bizben jumys isteýge kelisti. Múmkin olar qarapaıym zerthanalardan jalyqqan shyǵar. Elestetip kórińizshi, kúnde bir bólmede otyryp, sarǵaıyp kútýmen ýaqyt ótedi. Al bizde dınamıka bar. Oryndardyń únemi aýysýy jáne yńǵaıly jaǵdaıdaǵy adamdarmen qarym-qatynas jaqsy kóńil kúı syılaıdy», deıdi Toty.
CheckDoc basty nazardy qyzmettiń sapaly, jaıly bolýyna aýdarǵan. Bul jerdegi negizgi maqsat – bıomaterıaldy jınaýdy kúızelissiz júzege asyrý. Ol úshin adamdarǵa gematogender, dárýmender berip, meılinshe sypaıy sóılesýge tyrysady. Bul qarapaıym nárse sııaqty kórinýi múmkin. Biraq klassıkalyq aýrýhanalardan kóre almaıtyn, jetispeıtin dúnıe.
«Jobamyzdyń júzege asýy jaqsy boldy, biraq minsiz dep aıta almaımyn. Mysaly, birneshe aıdan keıin medbıkeler jumystan ketip qalyp jatty. Bul jobaǵa aýyr soǵady. Sonda ǵana olardyń máselelerine kóbirek kóńil bólýim kerek ekenin uǵyna bastadym. Bul sala bizdiń áleýetti básekelesterimizden seriktester jasaıdy. Biz klassıkalyq klınıkalardyń nanyn tartyp almaımyz. Kerisinshe, olarǵa óz qýatyn barynsha arttyrýǵa jáne kóbirek aqsha tabýǵa kómektesemiz. Sondyqtan qazir medısınalyq kompanııalarǵa birlesip jumys isteýdi usynamyz», deıdi servıs basshysy.
Jańashyl joba medısınadaǵy birqatar máseleni sheshedi. Syrqat sharshatqan qanshama naýqas kezek kútip otyratyny ótirik emes. Sıfrlyq tehnologııany júıesizdikti joıýǵa paıdalanǵanymyz quba-qup.