Elimiz Dúnıejúzilik memlekettik jumyspen qamtý qyzmetteri qaýymdastyǵynyń (WAPES) 81-múshesi bolyp qosyldy.
WAPES – bul jumyspen qamtý qyzmetine nemese eńbek naryǵyndaǵy saıasatty damytýǵa jaýapty memlekettik jáne úkimettik organdardyń halyqaralyq kommersııalyq emes qaýymdastyǵy. Ony 1988 jyly Kanada, Fransııa, Germanııa, Nıderland, Shvesııa, AQSh elderi Halyqaralyq eńbek uıymymen birlesip qurǵan. WAPES-ke múshe elder ózara jahandyq kásibı baılanys ornatýdy kózdeıdi. Iаǵnı jumysqa ornalastyrý, eńbek mıgrasııasy, kásiptik oqytý, memlekettik jumyspen qamtý qyzmetteriniń birlesken jobalary men is-sharalary sheńberinde yntymaqtastyqty arttyrady.
Eńbek resýrstaryn damytý ortalyǵynyń dereginshe, elimizdegi Memlekettik jumyspen qamtý qyzmetine óńirlerdegi jáne iri qalalardaǵy 20 eńbek mobıldiligi ortalyǵy, aýdandar men qalalarda ornalasqan 207 Mansap ortalyǵy, jumyspen qamtý máseleleri jónindegi jergilikti organdar kiredi.
Elimiz jumyspen qamtý jáne eńbek naryǵy salasynda aqparat almasý maqsatynda WAPES-ke múshe eldermen baılanys ornata otyryp, memlekettik jumyspen qamtý salasyndaǵy úrdister týraly júrgiziletin jobalar men zertteýlerge qatysa alady. Bul – elimizdiń jumyspen qamtý qyzmetiniń kásibı áleýetin arttyrýǵa jáne onyń qyzmetine ozyq halyqaralyq tájirıbeni engizýge, memlekettik jumyspen qamtý strategııasy men qyzmeti boıynsha jahandyq dıalogke úles qosýǵa, halyqaralyq arenadaǵy jumyspen qamtý salasyndaǵy múmkindigin kórsetýge, sondaı-aq qazaq eliniń álem elderi aldynda eńbek naryǵy boıynsha senimdi seriktes bola alatynyn kórsetedi.