Qazaqstannyń birinshi, álemniń 36-raketkasy Aleksandr Býblık Belgııanyń Antverpen qalasynda ótip jatqan «ATP 250» sanatyndaǵy týrnırdiń shırek fınalyna joldama aldy.
Osy jarystyń 3-raketkasy bolyp tirkelgen otandasymyz týrnırdi ekinshi aınalymnan bastap, tusaýkeser kezdesýin dúnıejúzilik reıtıngte 72-orynda turǵan fransııalyq Gregýar Barrermen ótkizdi. Qarsylastar osyǵan deıin bir-birimen bes márte oınap, sonyń úsheýinde Býblık jeńiske jetse, eki básekede Barrerdiń baǵy janǵan. Qos oıynshynyń besinshi básekesinde otandasymyzdyń mereıi ústem boldy.
Bir saǵatqa jalǵasqan matchtyń birinshi partııasynda otandasymyz besinshi geımde bir breık jasap, bul setti 6:4 esebimen óz paıdasyna jazdy. Al ekinshi kezeń bastalǵan bette Býblık qatarynan eki breıkpen kózge túsip, match sońynda qarsylasyn bet qaratpaı jeńdi – 6:2. Bul kezdesýde Býblık 11 eıs jasap, úsh breık-poınttyń barlyǵyn paıdalandy. Endi A.Býblık jartylaı fınalǵa shyǵý úshin álemdik reıtıngte 226-satyda ornalasqan taǵy bir fransııalyq tennısshi Djovannı Perrıkarmen sheberlik baıqasady. Sonymen qatar A.Býblık juptyq synnyń da shırek fınalyna shyqty.