Búginde -ov, -ev, - ova, - eva jalǵaýy bar tekterdi ıelengen el azamattaryn jıi kezdestiremiz. Qazirgi tańda aty-jóndi ózgertý sonshalyqty qıyn is emes. Oǵan kóp qujat jınap, sabylýdyń da qajeti joq. Egemen.kz tilshisi mundaı jalǵaýdan arylǵysy keletin oqyrmandarǵa az-kem aqparat usynady.
Eń aldymen ózińizdiń jeke kýáligińizdi jáne týý týraly kýáligińizdi alyp, turǵylyqty mekenjaıyńyz boıynsha Halyqqa qyzmet kórsetý ortalyǵyna júginýińiz qajet. Keıin, ne sebepti aýystyraıyn dep jatqanyńyz boıynsha ótinish jazasyz.
«Birinshi týý týraly kýálikti aýystyryp alý qajet, sodan keıin ǵana basqa qujattardy (jeke kýálik, júrgizýshi kýáligi, tólqujat, zeınetaqy kelisimsharty) aýystyrasyz. Eger atyńyzǵa kólik tirkelgen bolsa, onyń tehnıkalyq pasportyn da aýystyrý qajet», deıdi HQKO qyzmetkeri.
Aıta ketý kerek, tegińiz aýysqan jaǵdaıda barlyq qujatty aýystyrý mindettelmeıdi. Máselen, dıplom, attestat sekildi bilim týraly qujattarmen qatar tek, esim, ákesiniń aty aýysqany týraly kýálikti nemese neke týraly kýálikti kórsetý jetkilikti.
Qujattardyń daıyn bolý ýaqytyna keler bolsaq, ár qujat ártúrli qarastyrylady. Týý týraly kýálik úsh jumys kúniniń ishinde qarastyrylady, al jeke kýálik, tólqujat on bes jumys kúniniń ishinde daıyn bolsa, kólik júrgizý qujaty eki saǵattyń ishinde daıyn bolady.