Albanııa astanasy Tıranada ótip jatqan 23 jasqa deıingi balýandar arasyndaǵy álem chempıonatynda jerlesimiz Sultan Ásetuly jeńimpaz atandy.
Sportty damytý dıreksııasy baspasóz qyzmetiniń málimeti boıynsha, grek-rım kúresinen 67 kg salmaqta óner kórsetetin otandasymyz álem birinshiliginiń fınalynda túrkııalyq Mustafa Iyldyrymmen beldesip, asa tartysty ótken kezdesýde Sultan qarsylasyn 2-1 esebimen tize búktirip, 23 jasqa deıingi balýandardyń əlem chempıonatynda top jarǵan alǵashqy qazaq balýany atandy.
Sultan Ásetuly jahandyq dodanyń irikteý saıystarynda aldymen ýkraınalyq Oleg Halılovtan basym túsip, keıinnen Stıv Momılıa (Italııa) men Mýslım Imadaevty (Reseı) jarys jolynan yǵystyrdy. Jartylaı fınalda Ázerbaıjan balýany Hasan Mammadlıdi aıqyn basymdyqpen tize búktirip (9-0), fınalǵa joldama aldy. Jarystyń kezekti kúninen keıin Albanııadaǵy álem chempıonatynda Qazaqstan qorjynynda 1 altyn, 1 kúmis, 2 qola júlde bar.