Qarabalyq aýdanyna qarasty Mıhaılov aýyldyq okrýginiń ýchaskelik ınspektory, polısııa maıory Talǵat Qaımýsındi jergilikti turǵyndar antyna adal saqshy, kópke janashyr, qyraǵy polısııa qyzmetkeri dep biledi.
– Talǵat Saǵyndyquly bizdiń aýylda 2014 jyldan beri qyzmet atqaryp keledi. Naǵyz halyqqa jaqyn polıseı dep ataýǵa laıyq azamat. Osy eldiń maly joǵalsa, sony izdep tapqansha tynym tappaı mańaıdaǵy aýyldardy sharlap ketedi. Jalǵyzbasty qarııalarǵa kómek kerek bolsa da, bireýdiń kóligi jolda qalyp qoısa da, jurttyń bári, eń aldymen, Talǵatty izdeıdi. Únemi eldiń kóz aldynda júredi. Qysyltaıań shaqta batyl qımyldap, birneshe turǵyndy ajal aýzynan arashalap aldy. Naǵyz batyr jigit, – deıdi Mıhaılov aýyldyq okrýginiń ákimi Qaısar Áýbákirov.
Qyzmettik boryshyna adal tártip saqshysynyń aýyl turǵyndaryn bir emes, birneshe ret ajal aranynan alyp shyǵyp, arty aýyr qaıǵyǵa soqtyraıyn dep turǵan oqys oqıǵalardyń betin qaıtarǵan kezderi de bolǵan. Mysaly, byltyr 23 aqpanda ádettegideı túngi mindetin atqarýǵa shyqqan polısııa maıory turǵyn úılerdiń biriniń dálizinen qoıý tútin býdaqtap jatqanyn baıqap qalady. Sol mańaıda turatyn Andreı Evchenko ekeýi jalma-jan álgi úıdiń terezesin qaǵyp, ishte alańsyz uıyqtap jatqan turǵyndardy oıata bastaıdy. Odan qaıyr bolmaǵan soń esikti syndyryp ishke kirgen ýchaskelik polısııa ınspektory qolqany qapqan kók tútin men jalańdap jańa laýlaı bastaǵan qyp-qyzyl jalynnyń ishinen eki zeınetkerdi syrtqa alyp shyǵady.
Qysyltaıań sátte jedel qımyldap, eki birdeı ómirdi ajaldan arashalap qalǵan qaısar polıseıdiń erlik isi joǵarǵy basshylyqqa da jetedi. Artynsha bir-eki aıdan keıin Maıor Qaımýsın Astanaǵa shaqyrtylyp, Ishki ister mınıstriniń qolynan «Erligi úshin» medalin alady.
Talǵat Qaımýsın byltyr qaqaǵan qystyń ortasynda qudyqqa qulap ketken aýyl turǵynyn da aman alyp qaldy.
– Túnge qaraı jumystan kesh kelip, sý alyp kelýge qaıta syrtqa shyqqan betim edi. Qarsy aldymnan júgirip shyqqan jergilikti turǵyn Evgenıı Odınokov Alekseı esimdi seriginiń qudyqqa qulap ketkenin aıtty. Júgirip qudyqtyń basyna jettik. Tereńdigi 15 metr. Uzyn temir arqan laqtyryp edik, tarta bergenimizde shydamaı úzilip ketti. Qudyqtyń ishindegi sýdyń tereńdigi shamamen eki metrdeı bolyp qalady. Sodan álgi arqandy jalǵap, Alekseıge qaıta laqtyryp, «shamań jetkenshe belińe myqtap orap al» dedim. Tym quryǵanda muzdaı sýdyń betine alyp shyǵý kerek. Alekseıdi áýpirimdep júrip sýdyń betine shyǵardyq. Endi beri tartaıyq desek, shirip turǵan temir arqan úzilip ketýi múmkin. Sondyqtan Evgenııdi jip arqanǵa jumsap, ol qaıta oralǵansha sý betinde ustap turdym. Jip arqan kelisimen, Alekseıdi ekeýlep júrip segiz mınýttyń ishinde qudyqtan shyǵaryp aldyq, – deıdi tártip saqshysy.
Qostanaı oblysy