Ekinshi dúnıejúzilik soǵysta erlikpen qaza tapqan Mánshúk Mámetova týraly jazylǵan kitap ta, tipti kıno da az emes. Biraq bul jolǵy eki týyndynyń jóni bólek.
Eki kitaptyń biri – qazaqsha, ekinshisi orys tilinde jazylǵan. Qos týyndyny jazǵan belgili qalamger, ádebıettanýshy ǵalym, fılologııa ǵylymdarynyń kandıdaty Maqsat Táj-Murattyń aıtýynsha, «Neızvestnaıa voına Manshýk» kitaby batyrdyń týǵanyna 100 jyl tolýy qarsańynda Mádenıet mınıstrliginiń mańyzdy ádebıetter tizimi boıynsha jaryqqa shyqqan. Keıin Batys Qazaqstan oblysynyń ákimdigi batyr týraly baıannyń qazaqshasyn ázirleýdi suraǵan.
«Qazaqtyń batyr qyzynyń esimi óshpeýi kerek. Ol jaıynda jazý ıdeıasy 1986 jyly Oral qalasyndaǵy Mánshúk mýzeıine barǵanda týyndaǵan edi. «Mánshúk: muz ben jalyn jyry» atty kitapqa batyrdyń ǵumyrnamasyna qatysty tabylǵan derekter qosyldy. Biraq tolyq ǵumyrnamasy alda túzilýi kerek. Kitap – antısoǵystyq, antımılıtarıstik esse», deıdi Maqsat Táj-Murat.
Qazaqtyń qaısar qyzynyń týysy, Densaýlyq saqtaý isiniń úzdigi Sholpan Muhamedııardyń aıtýyna qaraǵanda, Mánshúk te taǵdyrdyń qatal synyna ushyraǵan. Ata-anasynan erte aıyrylǵan. Sol sebepten, týysy Ahmet Mámetov ony óz qyzyndaı tárbıelegen. Almatydaǵy №28 mektepti bitirgen soń medısınalyq rabfakta, keıin medısına ınstıtýtynda oqyǵan.
Alaıda 1942 jyly 20 jasynda maıdanǵa óz erkimen attanǵan. Dala gospıtalinde medbıke bolyp, keıin 21-atqyshtar dıvızııasyna qosylǵan. «Maksım» pýlemetimen jaýǵa qarsy oq jaýdyrǵan mergen qyz bir jyldan keıin qaza tapqan. Oǵan 1944 jyly Keńes Odaǵynyń Batyry ataǵy berilgen.
Al elimizde batyr qyzdyń esimin ıelengen birneshe bilim ordasy, ózge de nysandar bar. Máselen, Oraldaǵy halyqaralyq áýejaı, Qyzylorda qalasyndaǵy pedagogıkalyq kolledj Mánshúk Mámetovanyń atymen atalady.
Atyraý oblysy