Fransııa Prezıdenti Emmanıýel Makronnyń Qazaqstanǵa resmı saparyna oraı halqymyzdyń baı mádenı murasymen tanystyratyn arnaıy «Etnoaýyl» kórmesi uıymdastyryldy, dep jazady Egemen.kz Aqordanyń baspasóz qyzmetine silteme jasap.
Memleketter basshylary bastaǵan delegasııany kórme alańynda Jas kórermender teatrynyń ártisteri men «Qorqyt» etno-folklorlyq ansambli án shashýmen qarsy aldy.
Fransııadan kelgen joǵary mártebeli meımandar jemis-jıdekpen bezendirilgen «Kók bazardy», qolóner buıymdaryn jáne qazaq sýretshileriniń kartınalaryn, sondaı-aq otandyq dızaınerler ázirlegen ulttyq sán úlgileriniń defılesin tamashalady.
Sonymen qatar sheteldik qonaqtarǵa Ulttyq mýzeı qoryndaǵy eksponattardan («Altyn adam», «Berel jylqysy», «Sarmat kósemi», «Qypshaq jaýyngeri» t.b) jasaqtalǵan «Uly dala altyny» ekspozısııasy, Yqylas Dúkenuly atyndaǵy murajaıdaǵy ulttyq mýzykalyq aspaptar tanystyryldy.
Etnoaýyl aýmaǵynda Qasym-Jomart Toqaev pen Emmanıýel Makronǵa balýandarymyz qazaq kúresiniń ádis-tásilderin, jas jetkinshekter asyq oıynyn, al saıatshylar men qusbegiler tazy ıtteri men qyran qustaryn kórsetip, halqymyzdyń ańshylyq dástúri týraly áńgimelep berdi.