QR Eńbek jáne halyqty áleýmettik qorǵaý mınıstrligi men Memlekettik áleýmettik saqtandyrý qory Kostenko atyndaǵy shahtada oryn alǵan apat saldarynan qaza tapqan 17 kenshiniń balalaryna járdemaqy men tólemder taǵaıyndady, dep habarlaıdy Egemen.kz.
Qaıtys bolǵan 46 kenshiniń 21-iniń qamqorlyǵyndaǵylarǵa Respýblıkalyq bıýdjet qarajaty esebinen asyraýshysynan aıyrylý jaǵdaıy boıynsha memlekettik áleýmettik járdemaqy tólenedi.
«Osy járdemaqynyń mólsheri qaıtys bolǵan adamnyń asyraýyndaǵy adamdardyń sanyna qaraı aıqyndalady jáne olardyń aı saıynǵy mólsheri 37 322 teńgeden (1 balaǵa) 111 560 teńgege deıin (5 balaǵa) bolady. Járdemaqynyń bul túri 8 jasqa deıingi bala kútimin júzege asyratyn jumys istemeıtin analarǵa da taǵaıyndaldy», dep habarlady mınıstrlik.
Sondaı-aq memlekettik áleýmettik saqtandyrý qorynyń qarajaty esebinen asyraýshysynan aıyrylý jaǵdaıy boıynsha áleýmettik tólem beriledi.
«Bul tólemniń mólsheri qaıtys bolǵan adamnyń tabysy men onyń áleýmettik saqtandyrý júıesine qatysý ótili negizinde anyqtalady. Tólemder mólsheri aıyna 56 myń teńgeden 272 myń teńgege deıingi aralyqty quraıdy. Qoldanystaǵy zańnamaǵa sáıkes asyraýshysynan aıyrylý jaǵdaıy boıynsha tólemder balalar 18 jasqa tolǵanǵa deıin, al joǵary oqý oryndarynda kúndizgi bólimde oqyǵan jaǵdaıda 23 jasqa deıin tólenetinin esterińizge salamyz», delingen habarlamada.
Aıta ketý kerek, járdemaqylar men áleýmettik tólemder qaıtys bolý týraly kýálik negizinde taǵaıyndalady. Bul baǵyttaǵy jumys jalǵasyp jatyr jáne QR Eńbek jáne halyqty áleýmettik qorǵaý mınıstrliginiń, MÁSQ jáne «Azamattarǵa arnalǵan úkimet» memlekettik korporasııasy» KEAQ baqylaýynda bolady.