Qazaq kınosynyń atasy Sháken Aımanovtyń 110 jyldyǵyna oraı baıanaýyldyqtar tól perzentiniń esimin ulyqtaý sharalaryn bastap ketti. Jýyqta áıgili jerlesimizdiń atyndaǵy mektep-ınternatta bıýst ashyldy.
KSRO halyq ártisi Sháken Aımanovtyń esimin týǵan jeriniń halqy árdaıym ardaqtaıdy. Qazaqtyń mańdaıyna bitken jaryq juldyzynyń atynda oblysta kınoteatr, kósheler, mektep bar. Osydan biraz jyl buryn Baıanaýyldyń qaq ortasynan tulǵaǵa úlken eskertkish-kompozısııa ornatylsa, endi mine bıýsti ashylyp otyr.
Uıymdastyrýshylardyń aıtýynsha, Sháken Aımanov atyndaǵy mektep-ınternattyń aýmaǵynda ornatylǵan bıýst belgili rejısserdiń keler jyly atap ótiletin 110 jyldyq mereıtoıyna arnalǵan merekelik is-sharalardyń bastaýy. Zııaly qaýym ókilderi men jergilikti jurt ashylý saltanatynda músinge gúl shoqtaryn qoıdy. Bilim ordasynyń túlegi, aıtysker aqyn Aspanbek Shuǵataev jyrdan shashý shashyp, arnaý aıtty.
Bıýsti jasaýǵa «Edige Shoń» jaýapkershiligi shekteýli seriktestigi qarjylaı kómek kórsetken. Bıiktigi – 3,25 metr, tuǵyry bútin granıt tastan jasalǵan. Avtory – Asqar Nartov. Ol áıgili jerlesimizdiń buǵan deıingi eskertkishin de quıyp shyqqan edi.
Jerlesteri Sháken Aımanovtyń mereıtoıyna oraı oblys ortalyǵynda eskertkish ashylsa degen tilek tanytyp otyr.
Pavlodar oblysy,
Baıanaýyl aýdany