Portýgalııanyń Kaldash-da-Raınıa qalasynda dástúrli ART&TUR halyqaralyq týrıstik kınofestıvali ótip, onda Qazaqstan týrızmi týraly túsirilgen beınerolık eki atalym boıynsha úzdik dep tanyldy.
Bıyl 16-ret uıymdastyrylǵan kınofestıvalda Kazakhstan – Like Never Before saıahat týraly otandyq beınerolık «Úzdik eldik rolık» jáne «Úzdik jarnama kompanııasy» atalymdary (Destination – Countries, Advertising Campaign) boıynsha jeńimpaz atandy.
Kazakh Tourism ulttyq kompanııasy jasaǵan Kazakhstan – Like Never Before beınerolıginde otandyq, Qatar men Belgııa trevel-blogerleriniń Túrkistan qalasy men Almaty oblysyna jasaǵan saıahattary kórsetilip, elimizdi jańa qyrynan tanýǵa shaqyrady.
«Bul rolık – elimizdiń tańǵajaıyp tabıǵaty men mádenı murasyna sheteldik týrısterdiń nazaryn aýdarý tásilimizdiń júzege asqanynyń aıqyn kórinisi. Baıqaý uıymdastyrýshylary tarapynan berilgen joǵary baǵa elimizdiń álem týrısteri aldynda óte qyzyqty meken ekenin jáne beınerolıktiń óte sapaly ári kreatıvti jasalǵanyn taǵy da dáleldedi», dep atap ótti Týrızm jáne sport vıse-mınıstri Erjan Erkinbaev.
Beınerolıkti daıyndaýmen Ádilet Rahmetolla jáne Konstantın Kıkvıdze bastaǵan otandyq birikken shyǵarmashylyq top aınalysty.
Baıqaýǵa álem boıynsha túrli jobalar usynylyp, jarnamalyq kompanııalar, jarnamalyq fılmder, anımasııalar, avtorlyq saıahat beınerolıkteri, derekti fılmder, veb-qujattar jáne telebaǵdarlamalar sııaqty atalymdar boıynsha úzdikter anyqtaldy.
Halyqaralyq baıqaýdyń qazylar alqasy quramyna aýdıovızýaldy kıno, týrızm, marketıng jáne kommýnıkasııa salasyndaǵy mamandar men sarapshylar kirdi.
Bul – Qazaqstannyń atalǵan alańdaǵy alǵashqy jetistigi emes. 2021 jylǵy festıval aıasynda Kazakh Tourism ulttyq kompanııasy jasaǵan Travelstan beınerolıgi úzdik jarnama rolıgi atalymynda úzdik dep tanylǵan edi. Al ótken jyly «Tomas pen Lıýsı Atkınsondardyń Qazaqstanǵa kózqarasy» kommýnıkasııalyq jobasy ekinshi orynǵa ıe boldy.