Qýandyq Ýálıhanuly Bıshimbaev 1980 jyly týǵan. Qazaq memlekettik basqarý akademııasyn, M.Dýlatı atyndaǵy Taraz memlekettik ýnıversıtetin, «Bolashaq» baǵdarlamasymen AQSh-tyń Dj.Vashıngton atyndaǵy ýnıversıtetinde oqyp, magıstr dárejesin alǵan.
Onyń mansap joly «Qazaqstan damý banki» AQ-nyń bas menedjeri qyzmetinen bastalady. Ekonomıka jáne bıýdjettik josparlaý mınıstriniń jáne Premer-mınıstrdiń keńesshisi, Indýstrııa jáne saýda mınıstriniń orynbasary, Prezıdenttiń kómekshisi boldy. 2010-2011 jyldary ekonomıkalyq damý jáne saýda mınıstriniń orynbasary, 2011-2013 jyldar aralyǵynda «Samuryq-Qazyna» AQ basqarmasy tóraǵasynyń orynbasary qyzmetin atqardy. 2013 jyly 33 jasynda «Báıterek» Ulttyq basqarý holdıngi AQ basqarmasynyń tóraǵasy laýazymyna taǵaıyndaldy. 2016 jyldyń mamyr aıynda Ulttyq ekonomıka mınıstri qyzmetine kirisip, sol jyldyń jeltoqsan aıyna deıin atqardy. 2017 jyldyń 10 qańtarynda qamaýǵa alynyp, Qylmystyq kodekstiń 28-babynyń 3-bólimi («Qylmystyq quqyq buzýshylyq jasaýdy uıymdastyrǵan nemese onyń oryndalýyna basshylyq etý, sol sııaqty qylmystyq topty qurý ne oǵan basshylyq etý»), 189-baby 4-bóliminiń 2-tarmaǵy («Top bolyp nemese astyrtyn sóz baılasyp, senip tapsyrylǵan bóten múlikti ıemdenip alý nemese talan-tarajǵa salýdy uıymdastyrý») boıynsha aıypty dep tanyldy.
2018 jyldyń naýryz aıyna deıin sozylǵan sotta prokýror 12 jyl jaza kesýdi suraǵanymen, sýdıa 10 jylǵa sottap, ómir boıy memlekettik oryndarda basshylyq qyzmet atqarý quqyǵynan aıyryp, qylmystyq jolmen jıǵan múlkin tárkileýge úkim oqydy. Sottyń úkimimen 37 jasynda 10 jyl jaza arqalap, qatań rejimdegi kolonııada jazasyn óteýi tıis edi. Alaıda 2017 jyldyń 10 qańtarynan bastap jazasy eseptelgen Q.Bıshimbaev 2019 jyldyń kúzinde Shymkent qalasyndaǵy túrmeden bostandyqqa shyqty. Burynǵy Ulttyq ekonomıka mınıstri Prezıdenttiń Jarlyǵymen raqymshylyqqa ilinip, jazasyn óteý merzimi 10 jyldan 4 jylǵa qysqardy. Osylaısha ol jazasynyń úshten eki bóligin ótegende túzeý mekemesiniń basshylyǵy oń minezdeme jazyp berdi. Sýdıa Qylmystyq prosessýaldyq kodekstiń 476, 480 jáne 483 baptaryn negizge alyp, Qýandyq Bıshimbaevtyń 4 jyldyq jaza merziminiń túgesilýine 1 jyl 3 aı, 13 kún qalǵanda bostandyqqa shyǵarý jóninde qaýly qabyldady.
2019 jyldyń 11 qazanynda túrmeden bosap shyqqan eks-mınıstr arada 4 jyl 1 aı ótkende áıelin óltirdi degen kúdikpen ustalyp otyr. Bul týraly keshe habarlaǵan edik.