Áıelin óltirdi degen aıyppen ustalǵan eks-mınıstr Qýandyq Bıshimbaevtyń burynǵy áıeli Nazym oqıǵaǵa qatysty pikir bildirdi, dep habarlaıdy Egemen.kz.
«Iá, bul qorqynyshty tús. Qońyraýlar túskende, ne bolyp jatqanyn múlde túsinbedim... Shok», dedi Bıshimbaevtyń burynǵy áıeli.
Nazymnyń aıtýynsha, ol Qýandyq Bıshimbaevpen 14 jyl resmı nekede bolǵan. Erli-zaıyptylar 2020 jyly, eks-mınıstr túrmeden shyqqannan keıin bir jyldan soń ajyrasqan. Olardyń úsh balasy bar.
«Biz 2020 jyldyń 5 qazanynan bastap resmı túrde ajyrasqanbyz, birge ómir súrgen joqpyz. Balalarǵa qatysty jaǵdaıda sırek aralasatynbyz. Bul qaıǵyly oqıǵa, Saltanattyń otbasyna kóńil aıtamyn», dedi Qýandyqtyń burynǵy áıeli Nazym Bıshimbaeva.
Aıta keteıik, keshe Astanadaǵy Baý restoranynda 20:30 shamasynda burynǵy Ulttyq ekonomıka mınıstri Qýandyq Bıshimbaev óziniń zaıybyn soqqyǵa jyqqan. Áıel adam jedel járdem kelgenshe jan tapsyrdy. Qazir eks-sheneýnik qamaýda otyr.