Astanada Jaqsylyq Úshkempirov atyndaǵy Jekpe-jek saraıynda dzıýdo kúresinen Qazaqstan chempıonaty ótip jatyr. Ulttyq quramanyń sapyna alynatyn jastar úshin myqtylyǵyn dáleldeıtin doda bul. Sebebi bapkerler kelesi jyly mańyzdy dodalarǵa kimderdi qosatynyn osy ishki birinshiliktiń nátıjesine qaraı naqtylaıdy.
Bıylǵy chempıonatqa 17 oblys jáne Astana, Almaty, Shymkent qalalarynan 463 balýan qatysyp otyr. Saltanatty ashylý rásiminde sóz alǵan Týrızm jáne sport mınıstrligi Sport jáne dene shynyqtyrý isteri komıtetiniń tóraǵasy Erbol Myrzabosynov Qazaqstanda 133 myńǵa tarta adam dzıýdomen shuǵyldanatynyn málim etti. Jýyrda Qytaıdyń Hanchjoý qalasynda jazǵy Azııa oıyndary ótti. Qazaqstannan barǵan 525 sportshyǵa artylǵan senim aqtalmady. Memleket basshysy Qasym-Jomart Toqaev Azııa oıyndarynan keıin sportshylar men bapkerlerdi, osy salaǵa jaýapty mınıstrliktiń ókilderin qabyldap, quldyraǵan salanyń áleýetin kóterýge kúsh salý qajettigin aıtty. Tipti «otandyq sportta ádil básekelestik qaǵıdatyn ornatý» jóninde tapsyrma da júktedi. Qazaqstan dzıýdo federasııasy ishki birinshiliktiń ádil ótýi úshin shetten táýelsiz 3 tóreshi shaqyrtypty.
Sonymen bıylǵy el birinshiligine 463 balýan qatysty. Elimizde 133 myńǵa tarta adam sporttyń osy túrimen shuǵyldanady dedik. Qazaqstan jazǵy Olımpıada oıyndaryna 1996 jyldan bastap qatysady. Dzıýdo kúresinen áli chempıon shyǵara alǵamyz joq. 2008 jyly Beıjiń jazǵy Olımpıadasynda Ashat Jitkeev (100 keli), 2016 jyly Rıo jazǵy Olımpıadasynda Eldos Smetov (60 keli) kúmis júldeger atandy. 2016 jyly Brazılııa eli ótkizgen jazǵy Olımpıada oıyndarynda Mońǵolııadan ákelgen sportshy Galbadrah Otgonseseg (48 keli) qyzdar arasynda qola medal aldy. Eldos Smetov te 60 kelide qola júlde ıelendi. Jazǵy Olımpıada oıyndaryna 7 márte qatysyp, dzıýdo kúresinen alǵanymyz osy 4 medal ǵana. Elimizde 133 myń adam dzıýdomen kúresedi dep maqtanǵanymyzben, kúni keshe Qytaıda ótken jazǵy Azııa oıyndarynda О́zbekstan sportshylary kúrestiń osy túrinen 3 altyn, Tájikstan men Qyrǵyzstan balýandary da 1 altyn medal oljalady. Bizge buıyrǵany 1 kúmis, 2 qola júlde ǵana.
Keler jyldyń enshisindegi Parıj jazǵy Olımpıadasyna da sanaýly aı qaldy. Dzıýdo kúresinen de balýandarǵa júkteler úmit orasan. Biz Olımpıada chempıonyn baptap shyǵarǵanymyzǵa maqtanýǵa tıispiz, statıstıka sanyna emes.