«Zań men tártipti qatań saqtaý qaǵıdaty memlekettik deńgeıde dáriptelýi kerek». Bul jóninde Memlekettik keńesshi Erlan Qarın Telegram arnasyndaǵy resmı paraqshasynda jarııalady. Memlekettik keńesshi zańdylyq pen tártip qaǵıdatyn ornyqtyrý isi vandalızm, balalarǵa qarsy qylmys, turmystyq zorlyq-zombylyq sııaqty jaǵymsyz qubylystarmen kúresten bastalatynyn atap ótti.
«Mundaı quqyq buzýshylyqtarǵa qoıylatyn alǵashqy jáne óte mańyzdy tosqaýyl – azamattardyń olarǵa beıjaı qaramaýy. Sondyqtan elimizde júgensizdiktiń, ozbyrlyqtyń jáne qylmystyń kez kelgen túrine múldem tózbeýshilik ustanymyn qalyptastyrýdyń mán-mańyzy zor. Qoǵamda belsendi azamattyq kózqaras ústemdik quryp, izgilik, tilektestik, ózara kómek sııaqty basty qundylyqtar dáriptelýge tıis», deıdi E.Qarın.
«Memleket basshysy Qasym-Jomart Toqaev balalardyń qaýipsizdigi men olardyń quqyǵyn qorǵaý, turmystyq zorlyq-zombylyqqa qarsy kúres máseleleri týraly únemi aıtady. Onyń sóılegen sózderinen dáıektilik jáne myzǵymas ustanym baıqalady. Prezıdent júgensizdiktiń kez kelgen túrine, vandalızm men zorlyq-zombylyqqa qatań tosqaýyl qoıý kerek, ásirese áıelder men balalarǵa qarsy qylmys úshin jazany kúsheıtý qajet dep esepteıdi», degen Memlekettik keńesshi elimizde 2020 jyldan beri otbasylyq-turmystyq zorlyq-zombylyqqa qarsy kúres jolynda júıeli sharalar qabyldanyp jatqanyn atap ótken. Onyń aıtýynsha, Ulttyq qoǵamdyq senim keńesiniń bastamalaryn iske asyrý aıasynda polısııanyń tıisti bólimsheleriniń shtattyq sany artyp, otbasylyq-turmystyq zorlyq-zombylyq isterin qaraý úshin tergeýshi áıel mamandyǵy engizildi.
«Zańnamadaǵy sońǵy túzetýlerge sáıkes, endi mundaı qylmystar tek jábirlenýshi aryzynyń negizinde ǵana emes, sonymen birge kýágerlerdiń, kórshilerdiń málimeti, beınekameralardyń jazbasy jáne t.b. negizde anyqtalady. Budan bólek, qazir bir ret ymyraǵa kelgen taraptardyń keıin qaıta tatýlasýyna jol berilmeıdi. Jalpy, turmystyq zorlyq-zombylyq úshin ákimshilik jáne qylmystyq jaýapkershilik kúsheıtildi», dep atap ótti ol.
Alaıda qoǵamda bul máselege qatysty basqa kózqarastyń da bar ekenin alǵa tartqan Erlan Qarın: «Keıbireýler zańnamany odan ári qatańdatý mundaı qylmystardyń ashylý kórsetkishin tómendetedi dep esepteıdi. Alaıda tájirıbe kórsetip otyrǵandaı, jazanyń qatańdyǵy jáne odan bultarý múmkindiginiń bolmaýy – qylmysqa qarsy is-qımyldyń eń tıimdi tetigi. Bul máseleni tek zańnamaǵa ózgeris engizý arqyly sheshý múmkin emes. Sonymen birge azamattardyń kózqarasy, moraldyq ustanymy da ózgerýi kerek. Osyndaı áreketterge kóz jumyp qaraıtyn bolsaq, onda memleket qabyldap jatqan sharalardan esh nátıje shyqpaıdy. Iаǵnı destrýktıvti minez-qulyqtyń kez kelgen túrine qarsy kúres keshendi is-qımyldy talap etedi. Qoǵamda qylmysqa múldem tózbeýshilik qaǵıdaty, al memlekettik deńgeıde zań men tártiptiń qatań saqtalý qaǵıdaty dáriptelýi kerek. Sondyqtan memlekettik organdar men qoǵamdyq uıymdar júgensizdik pen zorlyq-zombylyqqa qarsy turýdyń tıimdiligin arttyrý úshin kúsh jumyldyryp, ortaq amal-tásil ázirleýi qajet», dedi.