Gollıvýdtyq kompanııa Qazaqstanda fılm túsiredi, dep habarlaıdy Egemen.kz 24kz-ke silteme jasap.
Áıgili amerıkalyq stýdııa Grýzııamen jáne bizdiń elmen odaq qurady. Teleshoý jáne kıno túsirý boıynsha yntymaqtastyq qos eldiń ulttyq mádenıetin dáriptep, aımaq ekonomıkasyn damytýǵa septigin tıgizedi degen senim mol. Alǵashqy fılmdi Qazaqstanda túsirý josparlanyp otyr.
Amerıkalyq WonderHill Studios kompanııasy Qazaqstan jáne Grýzııa elderimen yntymaqtastyq týraly memorandýmǵa qol qoıdy. Saltanatty shara Sınandalı qalasynda ótti.
«COVID-19 kesirinen stýdııamyz fılm túsirýdi toqtatyp, telebaǵdarlama óndirisine den qoıdy. Bári amerıkalyq kórermen arasynda keńinen tanyldy. Qazir qaıtadan kıno túsirilimin qolǵa alyp jatyrmyz. Osy rette Grýzııamen seriktestik ornatýdy jón kórdik. Qazaqstan da bizdiń jobalarǵa qatysýǵa daıyn. Menińshe, mundaı yntymaqtastyq aımaqqa jańa múmkindikter ashady», dedi Marvın Pırt, WonderHill Studios kompanııasynyń bas dırektory.
Alǵashqy birlesken kórkem fılm Qazaqstan men AQSh-ta túsiriledi. Týyndynyń jelisi erler arasyndaǵy báıgede bas júldeni qanjyǵasyna baılaǵan tuńǵysh qazaq qyzy jaıly órbıdi.
«Men Qazaqstannyń biraz óńirine saıahattap, túrli adamdarmen tanystym. Olardan qazaq halqynyń salt-dástúri týraly kóp nárse bildim. Fılm túsirýge bolatyndaı oqıǵalar men áńgimeler estidim. Sol kezde báıge dástúri men adamdardyń ómirlik qundylyǵy týraly tolyqqandy fılm túsirýge bolady degen oı keldi. Menińshe, AQSh-ta báıgege túsip júrgen qazaq qyzy jaıly shyǵarma amerıkalyqtardyń kóńilinen shyǵady dep oılaımyn», dedi ssenarıst Tom Tıcholz.
Fılmniń ssenarııi daıyn. Qazir ártister iriktelip jatyr. Basty róldi AQSh-taǵy qandasymyz Aıanat Kisenbaı somdaıdy. Akter qalyń kórermenge «Kóshpendiler», «Láılániń zary» fılmderi arqyly tanys.
Fılmniń bıýdjeti – 45 mıllıon dollar. Týyndy kelesi jyly túsiriledi. Sonyń arqasynda 2,5 myń jańa jumys orny ashylmaq.