Qostanaıda «Tórt toqsan – tórt óner» ulttyq mádenı-aǵartý jobasy aıasynda «Altyn saqa» olımpıadasy ótti. Mergender saıysyna óńirdiń segiz aýdanynan balabaqshaǵa baryp júrgen 50 shaqty búldirshin qatysty.
«Atalǵan baıqaýdyń maqsaty – jas urpaqty qazaq halqynyń tarıhı-mádenı murasyn qurmetteýge úıretý, balalardy batyldyqqa, tózimdilikke tárbıeleý. Atalǵan joba sheńberinde jyl boıy túrli chellendjder, jarystar, baıqaýlar ótkizilip jatyr. Búgingi olımpıada – osy keshendi is-sharalardyń jalǵasy desek bolady», deıdi Bilim basqarmasyna qarasty О́ńirlik deneshynyqtyrý jáne balalar men jasóspirimder týrızmi ortalyǵy dırektorynyń orynbasary Natalıa Rıabchenko.
Saqasyn ıirip, shıyryp asyq atyp, oıyn qyzyǵyna túsken balalardyń ishinde túrli ult ókilderi de barshylyq. Is-sharany uıymdastyrǵan qalalyq bilim bólimi mamandarynyń aıtýyna qaraǵanda, búginde Qostanaıda birneshe asyq atý úıirmesi jumys isteıdi eken. Sonyń biri – №3 balabaqshada. Munda 25 bala ulttyq oıyn úıirmesine baryp júr. «Bizdegi úıirme ata-analar men balalardyń qalaýy boıynsha ashylǵan. Qazir jaqsy jumys istep jatyr. Ulttyq oıyndardy úıretetin jalǵyz úıirme – osy. Mundaı úıirmeler batyl bolýǵa, mergendikke, shıraqtyqqa úıretedi, balanyń oılaý qabiletin damytady», deıdi mektepke deıingi tárbıe berý mekemesiniń ókilderi.
Jarys qorytyndysy boıynsha, 54 upaı jınaǵan №3 balabaqshanyń mergenderi birinshi oryndy jeńip alyp, jeńis tuǵyrynan kórindi. Jabylyp júrip 48 upaı jınaǵan №44 balabaqshanyń bóbekteri ekinshi orynǵa taban tirese, olardan nebári eki-aq upaı aıyrmashylyǵymen artta qalǵan №8 balabaqshanyń batyrlaryna úshinshi oryndy qanaǵat tutýǵa týra keldi.
Qostanaı oblysy