Astana halyqaralyq áýejaıynan jolaýshylar bıometrııalyq sáıkestendirý arqyly tirkeýden ótýi múmkin. Qazir áýejaı basshylyǵy elordanyń áýe qaqpasyna zamanaýı tehnologııany engizý múmkindikterin qarastyryp, kedergilerdi saraptap jatyr.
Bıometrııalyq sáıkestendirý arqyly tirkeý júrgizýdi qoldanysqa engizýge elimizdegi bıometrııalyq bazanyń bir jerge shoǵyrlandyrylmaǵany kedergi bop tur. Sondyqtan atalǵan máseleni jýyq arada sheshý ári áýejaıdaǵy sıfrlandyrý deńgeıin arttyrý mańyzdy.
– Astana halyqaralyq áýejaıy IATA halyqaralyq áýe kóligi qaýymdastyǵy men ICAO halyqaralyq azamattyq avıasııa uıymymen tyǵyz áriptestik ornatqan. Biz osy halyqaralyq uıymdardyń standarttaryna sáıkes áýejaı qyzmetin damytýdy jalǵastyramyz. Bıometrııalyq sáıkestendirý baǵdarlamasyn engizýdi avıasııa salasyndaǵy telekommýnıkasııa jáne IT baǵdarlamalardy daıarlaýǵa negizdelgen shveısarııalyq aqparattyq uıym SITA-men birlese júrgizýge nıettimiz. Bıometrııalyq sáıkestendirýdiń kómegimen jolaýshylar reıske tirkelý kezinde qajetti operasııalardyń barlyǵyn oryndaýǵa, qujattardy óz betinshe toltyrýǵa jáne basyp shyǵarýǵa, tólqujattyń elektrondy nusqasyn tolyq qoldanýǵa múmkindik alady, – deıdi «Nursultan Nazarbaev halyqaralyq áýejaıy» AQ basqarma tóraǵasy Erǵazy Joldasov.
Aıta ketý kerek, SITA-men aldyn ala kelisim boıynsha 27-30 qarasha kúnderi jolaýshylardy bıometrııalyq sáıkestendirý arqyly tirkeý baǵdarlamasy Astana halyqaralyq áýejaıynda synaq rejiminde iske qosylady. Synaq rejimine arnaıy fokýs-top qurylǵan. Eske sala keteıik, jolaýshylardy bıometrııalyq sáıkestendirý arqyly tirkeý Dýbaı, Sıngapýr, Gankong, Serbııa jáne Pákistannyń halyqaralyq áýejaılarynda keńinen qoldanylady.