О́ńirlik teatrlardyń ishinde kózge túsip júrgen B.Rımova atyndaǵy Taldyqorǵan teatry – kórermenniń kóńilin taba bilgen óner ujymy. Teatr jańa premeralarmen qýantyp jatyr. Jaqynda Túrikmenstanda ótken halyqaralyq baıqaýdan da júldeli oraldy.
Jetisý rýhanııatynyń altyn qazyǵy teatrdan bastalsa kerek. Sondyqtan óner ujymynyń ár qadamy halyqtyń kóz aldynda. Bıyl 7 túrli halyqaralyq hám respýblıkalyq dodalarda baq synap, qanjyǵalary bos qaıtpady. Klassıkadan modernge qaraı bet túzegen óner ordasy keler jyly da kórermendi kózaıym etýge asyq. Máselen, byltyr teatrdyń qoıylymdaryn tamashalaýǵa 47 myń adam kelse, bıyl 60 myńnan astam teatrsúıer qaýym jınalǵan.
«Osy jyldyń qazan aıynda Almaty qalasynda ótken I Halyqaralyq «Almaty puppet festival» qýyrshaq teatrlary festıvaline V.Vorobevtyń «Qyrsyq» eksperımentaldy qýyrshaq qoıylymymen qatystyq. Bul jarty ǵasyrǵa jýyq tarıhy bar kıeli orda úshin úlken jańalyq bolyp otyr. Sebebi teatrymyzdyń repertýarynda alǵash ret qýyrshaq qoıylymy sahnalansa ári atalǵan qoıylym tuńǵysh ret halyqaralyq deńgeıde ótken qýyrshaq teatrlary festıvaline qatysty», deıdi teatr dırektory Erlik Jýasbek.
Búginde kıeli orda jastarǵa qoldaý kórsetip, jańa múmkindikter berip otyr. Budan tálim alǵan shákirtter tek teatr sahnasynda ǵana emes, otandyq fılm, serıaldarda da tóbe kórsetip júr. Atap aıtsaq, Erkebulan Aıdymbaev «Aǵaıyndy», «Ádilettiń joly», «Qarasý», «Coco & Jambo»-ǵa, al Meıirjan Nurov «Brat ılı brak 3», «Batyr ız proshlogo», «Nvp Aǵaı», «Boztorǵaı Jyly uıa» týyndylarynda óner kórsetip, ekran syrtyndaǵy halyqtyń qoshemetine ıe boldy.
«Osy jyl biz úshin este qalatyn jyl boldy. Jalpy, 7 festıvalǵa qatystyq. Bul akterler úshin óte úlken múmkindik boldy. Basqa rejısserlerdiń eńbegin kórip, ártisteriniń ósý deńgeıin bildik. Bizdiń deńgeıimiz qandaı, qaı tusta ózimizdi qamshylaýymyz kerektigine mán berdik. Kókshetaý qalasynda ótken «Sálem» halyqaralyq teatr festıvaline «Qazaqy komedııa» qoıylymymen qatystyq. О́ner báıgesindegi qoıylym kókshetaýlyqtardyń kóńilinen shyqty. Jurtshylyq qazaqy komedııany jaqsy qabyldady», deıdi teatr akteri Erkebulan Aıdymbaev. Teatr qolyna endi dıplomyn alǵan jastarǵa múmkindik berip keledi. Máselen, «Muǵalim» spektaklinde 90 paıyz jas akterler óner kórsetedi. Bul da – óńirlik teatrda buryn-sońdy bolmaǵan úrdis.
«Petropavl qalasynda ótken Temirbek Júrgenovtiń 125 jyldyǵyna arnalǵan respýblıkalyq teatr festıvaline de qatysqan bolatynbyz. Onda baq synaǵan G.Hýgaevtyń «Qara shekpen» qoıylymy qazylar alqasy men kórermen qaýymnyń kóńilinen shyǵyp, «Temirbek Júrgenov atyndaǵy arnaıy syılyq» atalymyn ıelendi. Festıval óte joǵary deńgeıde ótti. Sebebi munda teatr álemindegi kil myqtylardyń basy birikti. Festıvaldan tájirıbe jınap, ózimizge keregin alyp qaıttyq», deıdi jas akter Meıirjan Nurov.
Sonymen qatar jaqynda kúlli túrki halyqtarynyń basyn qosqan Túrikmenstan jerinde ótken festıvalda teatr ujymy oblystyń ǵana emes, búkil elimizdiń namysyn qorǵap keldi. El ishinde alǵash ret festıvalǵa qatysqan oblystyq teatr retinde este qaldy.
«Ashhabad qalasynda ótken IV halyqaralyq festıvalda «Qorǵansyzdyń kúni» qoıylymyn usyndyq. Bul óner báıgesine qatysý arqyly teatrymyz sheteldik áriptesterimizben tájirıbe almasty», deıdi Aıgerim Bektemirova.
Aıta keteıik, halyqaralyq festıvalǵa Tatarstan, Qyrǵyzstan, О́zbekstan, Tájikstan memleketterinen ondaǵan teatr qatysqan. Joǵary dárejede óner kórsetken Taldyqorǵan drama teatry mınıstrlik pen festıvaldyń arnaıy kýbogimen jáne TÚRKSOI halyqaralyq uıymynyń dıplomymen marapattaldy.
Jetisý oblysy