Qazaqstannyń áýe tasymaly naryǵyn nyǵaıtý maqsatynda Kólik mınıstrligi Básekelestikti qorǵaý jáne damytý agenttigimen tize qosyp «Ashyq aspan» rejımin jetildirýdi qolǵa aldy, dep habarlaıdy Egemen.kz Azamattyq avıasııa komıtetiniń aqparatyna súıenip.
Budan bylaı sheteldiń iri áýe kompanııalarynyń ushaqtary Qazaqstannyń birneshe áýejaıyna shekteýsiz aıaldaıtyn bolady. Ári áýe kemeleriniń tıpteri men qoný jıiligine qaramastan ár baǵyt boıynsha shekteýsiz besinshi dárejeli «áýe erkindigimen» ushýyna múmkindik alady. Bul qadam áýe tasymalyndaǵy básekelestik artyp, bılet qunyn arzandatyp qana qoımaı, ushý geografııasynyń keńeıýine septigi tımek. «Ashyq aspan» rejımi Astana, Almaty, Shymkent, Aqtaý, Aqtóbe, Qaraǵandy, Túrkistan, О́skemen, Pavlodar, Kókshetaý, Taraz, Petropavl, Semeı qalasynyń áýejaıynda júzege asyrylady.