Qostanaı oblysy balyq ınspeksııasy basqarmasy 11 aılyq jumysyn qorytyndylady. Inspeksııa osy jyly zańsyz balyq aýlaýdyń 160 deregin anyqtaǵan. Tyıym salynǵan jerlerde balyq aýlaǵandar jalpy sommasy 2 725 500 teńge aıyppul arqalady, dep jazady Egemen.kz.
Oblystyq balyq ınspeksııasy basqarmasy ýyldyryq shashatyn aımaqta, zańsyz ıemdengen quraldardy paıdalanyp balyq aýlaýshylardy anyqtaý isinde jergilikti turǵyndar belsendi bolǵanyn aıtty. Máselen, rýdnyılyq turǵyndardyń habarlaýymen 4 ret zańsyz balyq aýlamaqshy bolǵandardyń joly kesilgen.
Sonymen birge osy baǵyttaǵy zańsyzdyqtardy anyqtaýda áleýmettik jelige júrgizilgen monıtorıngter de óz jemisin berip jatyr.
«Máselen, bıyl oblystyń eki turǵyny TikTok-qa júktegen vıdeosy úshin jazalandy. Vıdeoda zańsyz balyq aýlaý belgileri bolǵan. Aıyppul kólemi 34 500 teńgeni qurady», dedi Qostanaı oblysy balyq ınspeksııasy basqarmasynyń basshysy Dáýit Tájibaev.