Týrızm jáne sport mınıstri Ermek Marjyqpaev sporttyq atý federasııasynyń basshylary jáne jattyqtyrýshylar shtabymen kezdesti. Jıyn barysynda oq atý jáne stendtik atý ókilderi sportshylarymyzdyń sońǵy iri halyqaralyq týrnırlerdegi jetistikterin qorytyndylap, Parıj Olımpıadasyna daıyndyq josparyn tanystyrdy, dep habarlaıdy Egemen.kz vedomstvonyń baspasóz qyzmetine silteme jasap.
Qytaıdaǵy Azııa oıyndarynda Qazaqstan quramasy stendtik atýdan – 2 altyn, 3 qola, oq atý boıynsha – 1 altyn, 2 kúmis, 2 qola medaldardy qańjyǵalaryna baılady. Azıadada Z.Irnazarova, komandalyq skıt mıkstte Á.Orynbaı men E.Eshenko jáne áıelder arasyndaǵy komandalyq skıtte Z.Kravchenko, Á.Orynbaı, O.Panarına top jardy.
«Oq atý jáne stendtik atý – medaldar eń kóp sarapqa salynatyn sport túrleriniń biri. Ulttyq quramanyń keıingi jyldardaǵy nátıjeleri elimizde sporttyq atýdyń qarqyndy damyp kele jatqanyn kórsetedi. Mergenderdiń Azııa oıyndaryndaǵy jetistikteri barshamyzdy qýantty. О́nimdi jumys istelgeni kórinip tur. Eń bastysy – sizder búkil eldiń úmitin aqtadyńyzdar. Aldaǵy ýaqytta lısenzııalyq jarystar men 2024 jylǵy jazǵy Olımpıada kútip tur. Komanda kóshbasshylary irikteý saıystarynan sátti ótip, tórtjyldyqtyń basty dodasynda laıyqty nátıjeler kórsetetinine úmittenemiz», dep atap ótti Ermek Marjyqpaev.
Qazirgi ýaqytta sporttyq atý boıynsha Qazaqstan quramasy qorjynynda Parıj Olımpıadasynyń 3 lısenzııasy bar. 2024 jylǵa 4 lısenzııalyq týrnır josparlanǵan: 2 stendtik jáne 2 oq atý boıynsha, demek, joldamalar sanyn taǵy da kóbeıtýge múmkindik bar.
Kezdesý sońynda mınıstr quramanyń jattyqtyrýshylar shtabyna jeke alǵysyn bildirip, oq atýdan bas jattyqtyrýshy Olga Dovgýnǵa Memleket basshysynyń atynan estelik syılyq tabystady.