Jýyrda birqatar azamattyq qoǵam ókili Qazaqstanda AES qurylysyn qoldaıtyndaryn bildirdi. Astanada ÚEU, azamattyq qoǵam ókilderiniń qatysýymen «Beıbit atom» taqyrybynda respýblıkalyq semınar ótti. Onda AES-ke qatysty qazaq qoǵamyn mazalaǵan san alýan suraqqa jaýap izdedi.
Eldik is-sharaǵa arnaıy kelgen atom salasynyń sarapshylary semınarǵa qatysýshylarǵa elektr energetıkasyn damytýdyń boljamdy balanstary, Qazaqstanda AES salý josparlary jáne AES-tiń ekonomıkany kóterýge áseri týraly tereńnen tartyp, keń tolǵap aıtyp berdi.
Energetıka mınıstrligi Atom energetıkasy jáne ónerkásibi departamenti dırektorynyń orynbasary Gúlmıra Mýrsalova Qazaqstanda elektr energııasynyń tapshylyǵy sońǵy kezde anyq baıqalatyny jóninde baıandap, AES elektr energııasynyń turaqty bazalyq generasııasyn qamtamasyz etýge kómektesetinin túsindirdi.
«Qazaqstanda AES salyp, atom energııasyn beıbit túrde el ıgiligine jaratý, otanymyzdy elektr qýatyna táýeldilikten aıyrýmen qatar, onyń artylǵanyn kórshi elderge satyp puldaýǵa da jol ashady. Eń bastysy, aýany lastaıtyn zııandy shyǵyndylardy meılinshe azaıtyp, qorshaǵan ortanyń tazalyǵyn jaqsartyp, azamattardyń salamatty ómir súrýin qamtamasyz etýge de mol múmkindik beredi. Eldiń energetıkaǵa qatysty keleshegin búginnen bastap durys baǵamdaı almasaq, artta qalǵan elderdiń qataryna túsip qalýymyz ábden múmkin», dedi G.Mýrsalova
«QAES» JShS bas dırektory Tımýr Jantıkın Qazaqstanda AES salý jobasy, atom stansasynyń tehnıkalyq aspektileri men ekologııaǵa áseri týraly áńgimeledi. Sóz kezeginde «Baıtaq» partııasynyń tóraǵasy Azamathan Ámirtaev elimizde atom energetıkasyn damytý qajettigin táptishtep, AES – elektr energııasyn óndirýdiń naǵyz ekologııalyq kózi bolyp tabylatynyn aıtty.
«Jasyldar partııasy jasyl energııany, atom energııasyn qoldaıdy. Biz balalarymyzdyń bolashaǵyn jasyl energııanyń kómegimen qamtamasyz etýimiz kerek. О́ıtkeni atom elektr stansasynda parnıktik shyǵaryndylar joq. Sondyqtan Qazaqstanǵa atom elektr stansasyn mindetti túrde salǵan durys dep oılaımyn. Sebebi bizdiń elde elektr energııasynyń tapshylyǵy bar. Taǵy da qaıtalap aıtaıyn, AES Temirtaý, Balqash, Jańatas sııaqty qalalardaǵy kómir shyǵaryndylarynyń máselelerin sheshýge jáne eldiń ekologııalyq jaǵdaıyn jaqsartýǵa bek kómektesedi», dedi ol.
Semınardyń salmaqty bólimi pikir almasýda eldegi birqatar qoǵamdyq uıym men birlestiktiń jetekshileri, sondaı-aq belsendi ókilderi AES-ke qatysty oı-tolǵamdarynyń anyq qorytyndysy týraly ashyq aıtyp, barlyǵy bir pátýaǵa kelgendeı boldy. «Adamzat órkenıetiniń eń artynda qalmaıyq desek, AES-ti tolyq ıgerip, el ıgiligine durys paıdalanaıyq!».
Al «Kúmis eriktiler» QB ókili Elvıra Rafıkova elimizge AES aýadaı qajet dep sanaıtynyn aıtty.