Elimizde kóptegen adamnyń ómirin qıǵan aýqymdy apattardan keıin Prezıdenttiń Jarlyǵymen qaraly kún jarııalanady. Bul kúni memlekettik mekemelerdegi tý tómen túsirilip, oıyn-saýyq sharalary men konsertter toqtatylady. Memlekettik jınalystar bir kúndik únsizdikten bastalady. 2023 jyly elimizde eki ret aza tutý kúni jarııalandy, dep habarlaıdy Egemen.kz.
2006 jyldan beri Qazaqstanda 13 ret ulttyq aza tutý jarııalandy.
Eń alǵash aza tutý 2006 jyly 20 qyrkúıekte jarııalanǵan. Qaraǵandy oblysyndaǵy Lenın atyndaǵy shahtada metan jarylysy bolyp 41 kenshiniń ómirin qıyp áketti.
Bir jarym jyldan keıin elimiz qaıta qara jamyldy. 2008 jyldyń 11 qańtarynda Qaraǵandy oblysyndaǵy «Abaı» kómir kenishinde jarylys bolyp, 30 kenshi qaza tapty.
Úshinshi qaıǵyly data 2010 jyldyń 11 naýryzynda boldy. Sol kúni Qyzylaǵashta bóget buzyldy. Sol kezde bolǵan sý tasqyny el tarıhyndaǵy eń joıqyn sý tasqynynyń biri sanalady. Bul tabıǵı apattan 45 adam qaza tapty, onyń 11-i balalar edi.
2012 jyly Qazaqstanda aza tutý kúni eki ret jarııalandy. Birinshisi 5 maýsymda bolǵan. 28 mamyr kúni «Arqankergen» zastavasynda 14 shekarashy men bir ańshy qaza tapqan edi. Ekinshisi 25 jeltoqsanda Shymkentte An-72 ushaǵy apatqa ushyraǵannan keıin jarııalandy. Eske salaıyq, ushaq apatynan 27 shekarashy, onyń ishinde jeteýi ekıpaj múshesi qaza tapty.
Kelesi 2013 jyldyń 31 qańtarynda ushaq apatyna baılanysty qaraly kún jarııalandy. Almaty oblysynda, Qyzyltý aýylynyń mańynda Kókshetaý-Almaty baǵytynda ushqan Chellendjer-200 ushaǵy apatqa ushyrady. 16 jolaýshy men bes ekıpaj múshesi qaza tapty. Ushaq apatynan zardap shekkenderdiń arasynda Qazaqstannyń 20 azamaty men bir Qyrǵyzstan azamaty bolǵan.
2016 jyldyń 9 maýsymynda Qazaqstan azamattary Aqtóbede bolǵan jarylystyń qurbandaryn eske aldy. Artynsha bir top adam Aqtóbedegi eki qarý-jaraq dúkenin tonap, áskerı bólimge shabýyl jasaǵan. Sol kezde Qazaqstanda terrorıstik qaýiptiliktiń sary deńgeıi jarııalandy. Birneshe adam qaza tapty, onyń úsheýi áskerıler edi.
2019 jyly Almaty mańynda jolaýshylar ushaǵy apatqa ushyrap, 12 adamnyń qazasyna sebep boldy. Soǵan baılanysty atalǵan jyldyń 28 jeltoqsany jalpyulttyq aza tutý kúni dep jarııalandy.
Kelesi qaraly kezeń 2020 jyldyń 13 shildesinde bolǵan. Sol jyly Qazaqstan halqy COVID-19 pandemııasynyń qurbandaryn bir mınýt únsizdikpen eske aldy.
2021 jyldyń 29 tamyzy el tarıhyndaǵy taǵy bir qaraly dataǵa aınaldy. Jambyl oblysyndaǵy áskerı bólimniń aýmaǵyndaǵy oq-dári qoımalarynyń birinen shyqqan órt aýqymdy jarylystarǵa ákep soqty. Ol kezde 12 adam qaıtys boldy.
Qazaqstan úshin kelesi qaıǵyly kún – 2022 jyldyń 10 qańtary. Qańtar aıynyń alǵashqy kúnderi elimizdiń birneshe óńirinde oryn alǵan lańkestik áreketter saldarynan birqatar el azamattary kóz jumdy. Osy qaıǵyly oqıǵalarǵa baılanysty, Memleket basshysy Qasym-Jomart Kemeluly Toqaev 2022 jylǵy 10 qańtardy Jalpyulttyq aza tutý kúni dep jarııalady.
Al bıyl respýblıkada eki ret qaraly kún jarııalandy. 12 maýsymda el «Semeı ormany» memlekettik tabıǵı rezervatynda bolǵan órtte qaza tapqan ormanshylardy aza tutty. Aldymen joǵalǵan orman sharýashylyǵynyń úsh qyzmetkeriniń denesi tabyldy. 10 maýsym kúni keshke Abaı oblysyndaǵy órtti sóndirý jónindegi jedel shtabtyń málimeti boıynsha, jedel-izdestirý sharalary barysynda taǵy 11 qaza tapqan adamnyń máıiti tabyldy. Osylaısha órtten zardap shekkenderdiń sany 14 adamǵa jetti. El Prezıdenti qaza tapqan orman sharýashylyǵy qyzmetkerlerin qaıtys bolǵannan keıin marapattaý týraly jarlyqqa qol qoıdy.
2023 jyldyń 29 qazany elimiz úshin taǵy bir qaraly dataǵa aınaldy. Eske salaıyq, Kostenko atyndaǵy shahtada qaza tapqan kenshilerdi eske alý úshin kók baıraǵymyz tómen túsirildi.
Jarylys 28 qazan kúni saǵat 02:33-te boldy. Tilsiz jaý 46 kenshiniń ómirin jalmap ketti. О́rt kezinde shahtada 252 kenshi bolǵan. Qaıǵyly oqıǵadan keıin Prezıdent «ArselorMıttal Temirtaýmen» ınvestısııalyq yntymaqtastyqty toqtatýdy buıyrdy. Osy oqıǵaǵa baılanysty Bas prokýratýra qylmystyq is qozǵady.
Osylaısha 2023 jyly qyzmettik boryshyn óteý barysynda qaıǵyly oqıǵaǵa tap bolǵan 60 jerlesimizdi qaıǵyra eske alyp, aza tuttyq.