Qazaqstan elektrolız zaýytyndaǵy anod kúıdirý peshi kúrdeli jóndeýden ótip, qaıta iske qosyldy. Bul – óndiristi jańartyp, tehnıkalyq turǵyda qaıta qarýlandyrýdy kózdegen ınvestısııalyq baǵdarlamanyń jemisi. Jobanyń jalpy quny – 15,6 mıllıard teńge.
Alıýmınıı óndirisi tehnologııasynda aldyn ala kúıdirilgen anodtyń máni aıryqsha. Anod óndirisindegi eń aýqymdy jabdyq – anodty kúıdirý peshi. 50 kameradan turatyn jabdyqtyń uzyndyǵy – 200, al eni 30 metrden asady. Pesh jobasyn nemistiń «Riedhammer» kompanııasynyń mamandary ázirlep, ózderi ornatyp bergen. Keıin ony sheteldik mamandardyń baqylaýymen otandyq «Stroımontaj» kompanııasynyń ókilderi iske qosypty.
Zaýyt mamandarynyń sózinshe, kúrdeli jóndeý jumystaryna daıarlyq – óte jaýapty ári uzaq ýaqytty talap etetin mańyzdy úderis. Aýqymdy jumystyń tııanaqty kestesi jasalyp, jóndeý jumystary bastalmas buryn qajetti jabdyqtar, qosalqy bólshekter men materıaldar túgel jetkizilgen. Anod kúıdirý peshi tamyz aıynda tolyq toqtatylǵan edi. Al jóndeý jumystary josparly ýaqyttan 2 apta buryn aıaqtaldy.
Peshti jańǵyrtý barysynda álemdik anod óndirisi ónerkásibindegi eń ozyq jetistikter eskerildi. Jalynǵa tózimdi 14 myń tonna qaptama arshylyp, ornyna Nıderland, Úndistan men Germanııada shyǵarylǵan zamanaýı joǵary sapaly materıaldar qaıta ornatyldy. Odan bólek, shyǵaryndy gazdarǵa arnalǵan 4 kollektor almastyrylǵan. Sońǵy býyndaǵy jańa jabdyqtardyń senimdiligi joǵary ári olar pesh jumysyn aıtarlyqtaı jaqsarta alady. Kúrdeli jóndeýden soń anod kúıdirý kólemi jylyna 138,4 myń tonnaǵa jetedi dep josparlanǵan. Jańǵyrtýdyń ekinshi kezeńi – jalyn-jaǵý jabdyqtaryn almastyrǵan soń bul kórsetkish – 153 myń tonnaǵa jetedi degen úmit bar.
– Bul ınvestısııalyq joba tek kásiporynnyń óndiris kólemin ulǵaıtyp qana qoımaı, ónerkásiptiń energııa tıimdiligin arttyrý, qorshaǵan ortaǵa ekologııalyq júktemeni tómendetý syndy birqatar keshendi mindetterdi sheshýge baǵyttalǵan. Peshpen qatar biz gaz tazartý júıelerin de kúrdeli jóndeýden ótkizdik. Aldaǵy 10 jylda olardyń jumys tıimdiligi – 99,5 paıyz bolady, – dedi ERG-diń Qazaqstandaǵy bas dırektory Serik Shahajanov.
Qazaqstan elektrolız zaýyty jańa 16 elektrolızerdi iske qosyp, óndiris qýatyn ulǵaıtýdy kózdep otyr. Nátıjesinde, bastapqy alıýmınıı totyǵy óndirisiniń kólemin jylyna 14 myń tonnaǵa arttyrýǵa múmkindik týady. Kúıdirý peshterin kúrdeli jóndeý jumystary aldaǵy ýaqytta kásiporyndy óz anodtarymen qamtamasyz etýge sep.
Pavlodar oblysy