Belgııalyqtar asyrap alǵan Jánibek óziniń áleýmettik jelidegi paraqshasynda jańa jazba jarııalady. Ol Arqalyqqa anasyn izdep barǵan jýrnalısterge alǵys aıtyp, ár Qazaqstan azamatyna ótinish bildirdi, dep jazady Egemen.kz.
«Qazaq radıosynyń «Barmysyń, baýyrym?» habar redaksııasy qazir meniń týǵan jerim Arqalyqta, meniń anamdy izdep jatyr. Meniń olarǵa degen senimim zor. Men olarǵa rızamyn, barshaǵa rızamyn», dep jazdy Jánibek.
Sondaı-aq ol anasyn qushaqtaǵysy keletinin, úmitin úzbeıtinin aıtyp, qazaq eliniń kómegi aýadaı qajet ekenin aıtty.
«Sizderdiń de kómekterińiz aýadaı qajet. Meniń oqıǵama qatysty mańyzdy málimet biletin adamǵa meniń ótinishim áli jetpegen sııaqty...Aqparat berýden qoryqpańyzdar, maǵan jekege jazyńyzdar nemese qupııa túrde redaktor Ásel Asqarqyzy hat-habar qabyldaıdy. (whatsApp 8771 321 97 86)», dep jazyp Jánibek osy jazbasyn taratýdy surady.