Búgin Qazaqstan Respýblıkasy Prezıdentiniń janyndaǵy Memlekettik basqarý akademııasynda «Jas memlekettik qyzmetshi mektebi» jobasy aıasynda oqytý bastaldy. Oǵan elordalyq joǵary oqý oryndarynyń 3 jáne 4 kýrs stýdentteri qatysyp jatyr, dep habarlaıdy Egemen.kz.
Akademııa rektory Erlan Ábildiń aıtýynsha, joba memlekettik qyzmetke jańa lep ákeletin talantty jastardy tartý maqsatynda qolǵa alynǵan.
«Memlekettik qyzmetke jańa býyn qajet. Bizge ıdeıasy bar, kreatıvti, talantty, memlekettik qyzmette isteımin degen nıeti bar jastar qajet. Qazaqstannyń ósip-órkendeýi sizderdiń bilimderińizge, potensıaldaryńyzǵa, erik-jigerlerińizge baılanysty. Jas memlekettik qyzmetshi mektebinde oqý barysynda qatarlastaryńyzben toptasyp, pikir almasyp, daǵdylaryńyzdy arttyra alasyzdar», dedi rektor jıynnyń ashylý saltanatynda.
2023 jyly Qazaqstan Respýblıkasy Memlekettik qyzmet isteri agenttigimen birlesip bir aptalyq oqytý baǵdarlamasy ázirlendi. Oqytý aıasynda jas talanttar jobalyq basqarýdyń negizderi jáne jobany ázirleý, ony qorǵaý, tıimdi kommýnıkasııalar, praktıkalyq analıtıka, strategııalyq menedjment jáne kóshbasshylyq jáne t.b. daǵdylardy meńgeredi. Memlekettik basqarý júıesi, ádep kodeksi boıynsha praktıkalyq sabaqtar ótip, memlekettik qyzmet salasyndaǵy keısterdi taldaıdy. Oqytý kýrstaryn Akademııanyń professor-oqytýshylar quramy, praktık mamandar júrgizedi.
Jobaǵa ekinshi ret qatysyp otyrǵan L.N. Gýmılev atyndaǵy Eýrazııa ulttyq ýnıversıtetiniń 3-kýrs stýdenti Aıajan Merkibaı bolashaqta memlekettik qyzmetshi bolýdy josparlaıtynyn aıtty.
«Jas memlekettik qyzmetshiler mektebinde oqýǵa bıyl ekinshi jyl qatarynan qatysyp jatyrmyn. Maqsatym – aldyńǵy jyly alǵan bilimimdi bıyl jetildirý, daǵdylarymdy arttyrý. Qazirgi tańda Akademııada dáristermen qatar, praktıkalyq trenıngter de júrgizilip jatyr. Búgin alǵashqy dáristi kommýnıkasııa taqyrybynan bastadyq. Sebebi qoǵamda adamdar arasynda kommýnıkasııanyń jetispeýi kóp baıqalady. Bolashaqta memleketke qyzmet etip, elimizdiń gúldenýi úshin barymyzdy salamyz», dedi Memlekettik jergilikti basqarý mamandyǵynyń stýdenti.
Akademııada baǵdarlamany sátti aıaqtaǵannan keıin qatysýshylar memlekettik organdarda óndiristik praktıkadan ótedi.