Byltyr qys ortasy Rıdderdegi jylý-elektr qazandyǵy qaıta-qaıta isten shyǵyp, turǵyndardan maza qashqan. Ǵımarattardyń sýyp ketýine baılanysty mektepter men balabaqsha jumysy onlaın rejimge kóshirilip, qalada tótenshe jaǵdaı jarııalanǵanyn da bilemiz. Áıteýir, ala jazdaı júrgizilgen jóndeý jumysy nátıjeli bolǵan sekildi.
Qazandyqtyń tozyp ketýiniń birden-bir sebebi burynǵy menshik ıeleriniń nemquraılyǵy edi. Qazandyq jekemenshik qaramaǵynda bolǵanymen, tótenshe jaǵdaı oryn alǵan kezde memleket tıisti mamandardy tartyp, jóndeý jumystaryn qolǵa alǵan. Jaǵdaı Memleket basshysy Qasym-Jomart Toqaevtyń jeke baqylaýynda boldy. Respýblıkalyq qazynadan 8,39 mlrd teńge, oblystyq bıýdjetten 533 mln teńge bólindi. Sóıtip, jazdaı jylý ortalyǵynyń barlyq alty qazandyǵynda kúrdeli jóndeý júrgizildi. Qazir qalpyna keltirý úderisi tolyǵymen aıaqtaldy. Oblys jáne Rıdder qalasynyń ákimi Dáýlet Batyrbaev, ózge de salaǵa jaýapty qyzmetkerler kúni-túni JEO-da, jumystardyń basy-qasynda júrdi. Aıta ketý kerek, jylý-elektr stansasynyń jumysyn baqylaý áli kúnge deıin kún tártibinen túsken emes. Qandaı da oqys oqıǵany boldyrmaý úshin qazandyqta patrýldeý jumysy da uıymdastyrylǵan edi.
– JEO-daǵy alǵashqy apat byltyr qarasha aıynda boldy. Jylytý maýsymy kezinde qazandyqtarda 84 ret apatty óshirý oryn alǵan. Biraq jóndeý jumystaryn maýsymnyń birinde bastadyq. Oǵan deıin ortalyqtyń ıeleri aqaýdy qalpyna keltirý jumystaryn óz kúshimen jasaıtyndaryn aıtyp, oblys basshylyǵyn sendirip kelgen bolatyn, jyl basynda josparlaryn da kórsetken. Biraq olardyń múmkindikteri bolmady, – deıdi oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Nurlan Ramazanov.
Mamandar aıtyp ótkendeı, jylytý maýsymy shtattyq rejimde jumys istep jatyr. Qystaı qalany jylytý úshin tórt qazandyqtyń kúshi jetedi eken. Qatty aıazdarda ǵana qosymsha bir qazandyq qosylady. Sóıtip, búginde Rıdder jylý elektr ortalyǵynda kúrdeli jóndeýden ótken qazandyqtar orta qysymda qalypty jumys istep tur. Kúrdeli jóndeýden keıin qazandyqtardyń ózderi de, qubyrlar men qurylǵylar da sý jańa. Dese de Rıdderdegi jylý-elektr qazandyǵy qoǵam men BAQ ókilderiniń nazarynda.
Rıdder