Eki qutqarýshymen birge jer astyna túsip ketken avtobýs áne-mine tabylyp qalady degeli eki aptadaı ýaqyt ótti. Arnaıy tehnıkalar jol salyp, qutqarýshylar qoldarynan kelgenniń bárin istep jatyr. Geologııalyq skaner anyqtap bergen jerdi qazyp jatqan ekskavator ázirge qutqarýshylarǵa tıesili birneshe zatty ǵana alyp shyqty.
Oqıǵa ornynda qurylǵan jedel shtabtyń úılestirýimen buǵan deıin oıyqtyń túbine deıin aýyr tehnıkalardyń kúshimen jol salynǵan. Balqash qalasynan jetkizilgen geologııalyq radar topyraq qabatyn skanerlep, avtobýstyń jatqan jerin shamamen tapty. Burnaǵy kúni oıyq túbine shaǵyn ekskavator túsirilip, álgi jerdi qaza bastady. Jedel shtab ókilderi habarlaǵandaı, tehnıka shuńqyrdyń búıir qabyrǵalary qulaý qaýpin eskere otyryp, jer qazý jumystaryn asa saqtyqpen júrgizgen.
«Jumystardy júrgizý kezinde ishinde jumys qujattary men jolsapar jýrnaly bar qutqarýshylar sómkesi, sondaı-aq memlekettik tirkeý nómiri bar avtobýstyń shanaq bóligi tabyldy. Izdestirý áli de jalǵasýda. Avtobýstyń boljamdy ornalasqan jerine deıingi topyraq qazyp alynǵan soń, ekskavatordyń jumysy aıaqtalady. Mamandar jer astynda jatqan avtobýsty joǵary kóterý jumystaryn bastaıdy. Biz bul jumystardy búgin-erteń aıaqtaımyz dep úmittenemiz», delingen Pavlodar oblysy ákiminiń baspasóz qyzmeti taratqan aqparatta.
Keshe Tótenshe jaǵdaılar vıse-mınıstri Baýyrjan Syzdyqov avtobýsty shyǵarý jumystary óte qıyn jaǵdaıda júrip jatqanyn málimdedi.
«Jaǵdaı óte kúrdeli. Mamandar jerdiń skrınin túsirip, avtobýstyń shamamen qaı jerde ornalasqanyn anyqtady, ıaǵnı qurylǵylar ol jerde shynymen metall bar ekenin kórsetip tur. Biraq bul metaldyń astynda áli de bos keńistik bar. Sondyqtan bizdiń qutqarýshylarymyz, ákimdik pen basqa da memlekettik organdardan, arnaýly uıymdardan tartylǵan mamandar qazir óte qıyn jaǵdaıda jumys istep jatyr. Birinshiden, ol jerdegi temperatýra nólden tómen deńgeıde. Ekinshiden, qutqarýshylar men jumysshylardyń ómiri men densaýlyǵyna qaýip tónýi múmkin. Topyraq sýsysa, onda qazyp jatqan tehnıka tómen qaraı qulaýy múmkin. Avtobýstyń astyndaǵy bos keńistiktiń aýmaǵy qanshalyqty úlken ekenin naqty bilmeımiz», dedi B.Syzdyqov.
«Maıqaıyńaltyn» AQ bas dırektory Qýanysh Botın habarlaǵandaı, oqıǵa kúni shaqyrtýǵa bara jatqan qutqarýshylar avtobýsynyń sońynan kenish dırektory Andreı Shývalov jeke kóligimen ilesip otyrǵan. Ol avtobýstyń oıyqqa túsip ketkenin kórip, kilt toqtaǵan. Oqıǵany tıisti organdarǵa habarlaǵan da sol kórinedi. Alaıda opyrylǵan jerdi kúzetshiler qalaı kórmeı qalǵany túsiniksiz.
Pavlodar oblysy,
Baıanaýyl aýdany,
Maıqaıyń kenti