Keıingi kezderi «este saqtaý qabiletim nasharlap ketti» degen sózdi kóp estımiz. Tehnologııa damyǵan saıyn qarapaıym istiń ózin muńǵa aınaldyryp alatyn boldyq. Onyń bári adam kapıtalynyń sapasyn túsirip, tipti jad jumysynyń tómendeýine alyp keldi. Biraq tehnologııa buǵan da sheshim tapty. Aıbolat Qulataı oıyn arqyly mı gımnastıkasyn jasatqyzatyn qazaq tilindegi zııatkerlik oıyn jasap shyǵarǵan.
Aıbolattyń kókeıinde qoǵamǵa ózgeris ákeletin joba jasaımyn degen maqsat bar edi. Sol maqsaty Aqyl Battle-ǵa ulasyp, búginde qosymshaǵa 650 myń qoldanýshy tirkelgen. Qazir bul qosymsha qazaq tiliniń aıasyn keńeıtip, ulttyq tanymdy dáriptep júr. Eki oıynshynyń jarysy formatyndaǵy onlaın-kýız 5 raýndtan turady. Árqaısysynda ártúrli taqyrypta úsh suraq bar. Mysaly, logıka, tanymal tulǵalar, qazaq ádebıeti nemese sport. Qatysýshylar taqyryp tańdap, kezekpen shekteýli ýaqytta suraqtarǵa jaýap beredi.
– Ártúrli tujyrymdamany oılastyrdym, ózim de zııatkerlik oıyndarǵa qumarmyn. Stýdent kezimde «Aqyldylar shaıqasy» onlaın-vıktorınasyna qatystym. Kýrstastarymmen, tipti professorlarmen oınadyq. Sóıtsem, bul Quizduel shved jobasynyń TMD elderine beıimdelgen úlgisi eken. Mundaı qosymshalardaǵy suraqtar ádette flora men faýna, tarıh, geografııa sekildi jalpy taqyryptarǵa arnalǵan. Mobıldi qosymsha jasaý tájirıbemizge súıensek, zııatkerlik oıyndar baǵyty biz úshin tıimdi. Ony bir aıda jasaımyz dep oıladyq, biraq qatelesippiz. Qosymshany ázirleý úderisinde kóptegen nıýans paıda boldy. Oıyn mehanıkasyn únemi jetildirip otyrý qajet boldy. 2022 jyldyń jazyna qaraı synaq nusqasyn daıyndap úlgerdik, al qyrkúıekte tolyq rejimde jumys isteı bastadyq, – deıdi Aıbolat.
Oıyndy jasap shyǵarýǵa kóp qarjy men qajyrly eńbek jumsalǵan. Qazir komandada Android jáne iOS ázirleýshiler, bekenderler, synaýshy, dızaınerdi qosqanda 10 adam jumys isteıdi. Kontent-bólim men marketıng bólimi de bar. Qosymshany push-marketıngsiz kúndelikti 10-15 myń adam qoldanady. Keı kezderi syılyq oınatyp, chempıonat ótkiziledi. Ondaı kúnderi qoldanýshylar sany ortasha eseppen 35-45 myń adam bolsa, endi birde 114 myńǵa jetedi. Eń qyzyǵy, oıynshylar arasynda tórt myń oıyn oınap, mıllıonnan astam upaı jınaǵandar bar. Ondaı jandarǵa jańa suraqtar ázirlep, ony engizip úlgerý qıyn is. Sol sebepti adamdar qosymshadan shyǵyp ketpeýi jáne jınaǵan upaılaryn baǵaly zatqa aıyrbastaı alýy úshin Aqyl Battle basshylyǵy baıqaýlar uıymdastyrǵan. Sóıtip, týrıstik agenttikpen birneshe joldama oınatyp, Almaty men Astanany kórmegen bir qatysýshy alǵash ret Dýbaıǵa baryp qaıtty.
– Qosymshany paıdalanýshylar bonýs úshin WhatsApp arqyly dostary men týystaryn shaqyrdy. Bizde qazaqtildi aýdıtorııa basym. Jaqynda oryssha nusqasyn qostyq. Aqyl Battle – ýaqytty ótkizýdiń bir túri. Ol jolda, jumys arasynda, tipti toılarda oınalady. Men bir qyzdyń jigitpen qalaı tanysqanyn bilemin, onyń telefon nómirin bilý úshin jigit ony Aqyl Battle oıynyna shaqyrǵan. Ár jeńisi úshin qyz nómiriniń bir sanyn aıtyp otyrǵan. Qazir bizde qazaqtyń salt-dástúrleri men maqal-mátelderin qosqanda suraqtardyń 40 sanaty bar. Oıyn kezinde adam jańadan kóp nárseni biledi. «Aqyldylar shaıqasynda» tek 6 sanat bar, al taqyryptar jergilikti halyqqa beıimdelmegen, – dedi joba avtory.
Alǵashqy 8 aıda joba jaqsy kiris ákelipti. Aýdıtorııa jyldam ósip, qosymsha jarnama kórsetý úshin Google-dyń AdMob quralyn qosqan. Google jarnamaǵa úsh aı boıy 30 myń dollar tólegen. Biraq ýaqyt óte kele trafık birte-birte túsip, jarnamadan túsetin tabys ta azaıǵan. Eýropa men AQSh-ta jarnamany kórsetý baǵasy Ortalyq Azııa elderine qaraǵanda joǵary ekeni ras. Sondyqtan olar jańa aýdıtorııaǵa shyǵý úshin basqa tilderde mazmun jasaý týraly oılaı bastaǵan.
Astana Hub-tyń Invest Day is-sharasynda jobanyń tanystyrylymy ótken. Sodan keıin áleýetti ınvestorlarmen kelissózder júrgizile bastaǵan. Keleshekte mobıldi jáne kezdeısoq oıyndarǵa suranys joǵary Túrkııa men MENA elderiniń naryǵyna shyǵýdy qarastyryp otyr. Munyń joly da ashyq, óıtkeni Aqyl sózi ártúrli halyqtyń tilinde bar. Mamandardyń pikirinshe, Ystanbul jalpy oıyn ındýstrııasynyń álemdik astanasyna jatady. Keıingi alty aıda jergilikti geımdev-kompanııalar osy salada Ulybrıtanııa men Skandınavııadan da kóp ınvestısııa tartqan. Onda qazir mobıldi oıyndardy ázirleýshi 300-ge jýyq kompanııa bar, olar Túrkııanyń eresek turǵyndarynyń 70 paıyzyn qamtıdy, bul degenińiz – 44 mıllıon oıynshy.
– Qazaqstanda qumar oıyndar men bás tigýge táýeldilik máselesi bar. Biz óz mysalymyzben laıyqty syıdy bilim arqyly alýǵa bolatynyn kórsetkimiz keledi. Taǵy bir týrnırde «Bolashaq» baǵdarlamasyna jáne basqa da oqý baǵdarlamalaryna tegin daıyndaý utysyn oınattyq. Mundaı kýrs jylyna 10 myń dollar turady. Keleside jeke týrnır aıasynda Nárikbaev ýnıversıteti men Halyqaralyq aqparattyq tehnologııalar ýnıversıteti granttarynyń utysyn ótkizemiz. Qazir mınýsqa jumys istep jatyrmyz, biraq onlaın-týrnırler jaǵdaıdy túzetýi kerek. Alǵashqy bılet satýdan túsken tabys 2 mln teńgeni qurady. Mádenıet mınıstrligimen birlesken oflaın týrnır ótkizý tájirıbesi de boldy. Irikteý kezeńderin onlaın ótkizip, ár óńirdiń jeńimpazyn Astanaǵa úlken fınalǵa shaqyrdyq, – degen tyń oı aıtty ol.
Joba qurastyrýshylary buryn suraqtardy ózderi qurastyratyn edi. Al qazir satyp alady. Olardyń aıtýynsha, suraqtar sanaty kóp, júıeli túrde jańartyp jáne aýdaryp otyrýǵa ýaqyt jetpeıdi. Onyń ústine barlyq salanyń sarapshysy bolý múmkin emes, al adamdarǵa únemi jańa kontent kerek. Bolashaqta jasandy ıntellekt tehnologııalaryn tartqysy keledi, biraq ázirge ondaı saraptama joq. Chat GPT de qazaqsha sapaly kontent bere almaıdy.
– Durysy jasandy ıntellekt bizge suraqtardy oıynshylardyń ultyna qaraı irikteýge kómektesedi. Júıe bul máseleni sheship jatyr, biraq jetildiretin dúnıe áli de bar. Ázirshe derekterdi jınap, ony qalaı paıdalanatynyn zerttep jatyr. Suraqtardyń qaı sanaty kóbirek suranysta nemese kerisinshe ekeni kórinip turady. Oıynnyń ári qaraı damýy úshin jańa mazmun men jańa oıyn mehanıkasyn qurý kerek. Biz qazir basqa oıyndardaǵydaı oıyn ishindegi saýdany bastaýǵa kómektesetin mamandy izdep jatyrmyz. Halyq sol úshin aqsha tóleýge daıyn. Múmkin ol sheteldik maman bolar. О́ıtkeni Qazaqstanda mundaı sarapshyny áli tappadyq. Sondaı-aq biz júıeni únemi jetildirip otyramyz, sebebi suraqtyń jaýabyn Google-dan izdeıtin nemese upaı alý úshin basqa da aıla qoldanatyndar bar, – deıdi Aıbolat Qulataı.
Joba avtorlary qazir oıyndy TMD elderine taratýdy kózdep otyr. Túrkitildes elderge shyǵarý maqsaty da – aıqyn. Qazir kontent aǵylshyn, túrik, arab, orys tilderine aýdarylyp jatyr. Kelesi jyly gıpotezalardy synap, túpkilikti sheshim qabyldaıdy. Sonda oıyn mazmuny kóptildi deńgeıge ótip, ártúrli eldegi paıdalanýshylar bir platformaǵa biriktiriledi.