Senat Tóraǵasy Máýlen Áshimbaev QHR Búkilqytaılyq halyq ókilderi jınalysy Turaqty komıteti Tóraǵasynyń orynbasary Hao Mınszınmen kezdesti, dep jazady Egemen.kz joǵarǵy Palatanyń baspasóz qyzmetine silteme jasap.
Máýlen Áshimbaev Qazaqstan men Qytaı arasynda ǵasyrlardan beri jalǵasyp kele jatqan dostyq pen ózara qoldaýǵa negizdelgen belsendi saıası dıalog qalyptasqanyn atap ótti. Strategııalyq yntymaqtastyqtyń nyǵaıýyna eki el basshylarynyń ózara senimge taban tiregen qarym-qatynasy zor yqpalyn tıgizip keledi. Byltyr Qazaqstan Prezıdenti Qasym-Jomart Toqaevtyń Qytaıǵa jasaǵan saparlary nátıjesinde 28 ekijaqty qujatqa jáne 78 kommersııalyq kelisimge qol qoıyldy.
Palata Spıkeri parlamentaralyq deńgeıdegi ózara is-qımyldy halyqaralyq uıymdar aıasynda da odan ári arttyrýdyń mańyzdy ekenine nazar aýdardy.
«Biz Búkilqytaılyq halyq ókilderi jınalysymen yntymaqtastyqty damytýǵa jáne zańnamalyq baǵytta tájirıbe almasýǵa múddelimiz. Eki eldiń zań shyǵarýshy organdarynda parlamentaralyq dostyq toptary qurylǵan. Naqty ári ózekti máselelerdi sheshý jolynda osy toptardyń áleýetin paıdalanýymyz kerek. Bul rette dostyq toptaryna múshe depýtattardyń qatysýymen ózara saparlar uıymdastyrýdyń jáne turaqty komıtetter arasynda baılanys ornatýdyń mańyzy zor», dedi M.Áshimbaev.
Kezdesý barysynda taraptar halyqaralyq jáne óńirlik kún tártibine qatysty aýqymdy máselelerdi de talqylady. Saýda-ekonomıkalyq jáne mádenı-gýmanıtarlyq yntymaqtastyqty odan ári arttyrýǵa da basa mán berildi. Atap aıtqanda, ınvestısııalyq yntymaqtastyq, týrızm, sýmen qamtamasyz etý jáne taǵy basqa baǵyttar boıynsha ózara baılanysty jandandyrýǵa qatysty tyń bastamalar sóz boldy.
Sonymen qatar Senat Tóraǵasy Memleket basshysynyń reformalaryn zańnamalyq turǵydan qamtamasyz etý úshin Palata atqaryp kele jatqan jumystar jóninde aıtty.
Odan bólek, Qytaıdyń býddızm jáne daosızm qaýymdastyqtaryna Álemdik jáne dástúrli dinder lıderleriniń sezine júıeli túrde qatysyp jáne Forým ıdeıalaryn qoldap kele jatqany úshin alǵys bildirdi.
«Byltyrǵy qazan aıynda Astanada Sezd Hatshylyǵynyń XXI otyrysy ótti. Onda biz Sezdi damytýdyń aldaǵy 10 jylǵa arnalǵan tujyrymdamasyn qabyldadyq. Qujatta Forým damýynyń jańa kezeńi men maqsat-mindetteri aıqyndalǵan. Qytaıdyń býddızm jáne daosızm qaýymdastyqtarynyń basshylyǵy Sezd aıasyndaǵy is-sharalarǵa turaqty ári belsendi túrde qatysyp keledi. Aldaǵy ýaqytta da osy baǵyttarda Qytaı ókilderimen birlesken jumysymyzdy jalǵastyra beremiz dep senemin», dedi Senat Spıkeri.
О́z kezeginde Hao Mınszın Qazaqstanda júrgizilip jatqan qoǵamdyq-saıası jańǵyrtýlardy joǵary baǵalap, yntymaqtastyqty odan ári keńeıtýge múddeli ekenin jetkizdi. Sondaı-aq ol túrli dinder arasynda dıalog qalyptastyrý jáne jahandyq qaýipsizdik máselelerin ilgeriletý jolynda Álemdik jáne dástúrli dinder lıderleri seziniń jumysy mańyzdy ról atqaratynyn atap ótti.