О́ńirde ınvestorlarǵa kedergi bolyp otyrǵan máselelerdiń biryńǵaı tizilimi jasalatyn boldy. Bul kásipkerlikti qoldaý sharalarynyń órisin keńeıtip, shaǵyn jáne orta bıznestiń damýyna qolaıly jaǵdaı týǵyzýǵa múmkindik bermek.
Kásipkerler palatasynyń bul bastamasy oblys basshylyǵy tarapynan qoldaý taýyp otyr.
«Biz aı saıyn ákimdiktiń quzyrly basqarmalarymen birlese otyryp, atalǵan tizilim arqyly bıznestiń damýyna bóget bolyp otyrǵan kúrmeýli máselelerdi dál anyqtap, sarapqa salyp, qajet bolǵan jaǵdaıda keıbir zań kúshi bar qujattarǵa ózgeris engizýdi talap etetin usynystardy qarastyramyz. Bul máseleni jedel sheshýge jáne iri ınvestısııalyq jobalardyń aınalasyndaǵy shaǵyn bıznestiń damýyna yqpal etedi», deıdi oblystyq kásipkerler palatasynyń dırektory Danııar Kúzenbaev.
Kásipkerlikti damytýǵa arnalǵan ulttyq joba aıasynda óńirde «Qyzmettik qoldaý», «Keńes berý», «Iskerlik baılanys» jáne «Men kásipkermin» dep atalatyn tórt baǵyttaǵy qoldaý sharalary tıimdi iske asyrylyp jatyr.
Máselen, 2023 jyly palata mamandary 1 189 kásipkerge qyzmettik qoldaý kórsetip, 13 myńnan astam turǵynǵa jeke kásibin ashý, bıznesin keńeıtý jóninde keńes bergen. Byltyrdyń ózinde oblysta 246 jeke kásipkerlik nysany men JShS ashyldy. Palata ókilderiniń kómegimen jalpy somasy 1,5 mlrd teńge bolatyn 198 joba iske qosylyp, 171 jańa jumys orny ashyldy.
О́tken jyly «Iskerlik baılanys» jobasy boıynsha 3 kásipker Germanııa kásiporyndarynda bolyp, batysta bıznes júrgizýdiń qyr-syrymen tanysyp, tájirıbe almasyp keldi. Taǵy 3 kásipker Eýropa kásiporyndaryna baryp, bıznes-taǵylymdamadan ótti. Germanııamen iskerlik qatynas bıyl da jalǵasyn tappaq. Qazir bıznes-taǵylymdamadan ótýge nıetti kásipkerlerden ótinish qabyldanyp jatyr. Munyń syrtynda, «Iskerlik baılanys» jobasyna qatysyp jatqan birneshe kásipkerdi Japonııaǵa jiberý josparlanyp otyr.
О́ńirde «Men kásipkermin» jobasy «Kásipke baǵyt» jáne «Kásipker áıelderdi qoldaý ortalyǵy» dep atalatyn eki baǵyt boıynsha júzege asyrylyp jatyr. Birinshisi jylyna, kem degende, 40 kásipkerge salalyq bilim berýdi kózdeıdi. Atalǵan baǵyt boıynsha byltyr Fedorov aýdanynda 15 kásipker sút ónimderin óńdeýdiń óndiristik joldaryn ıgerse, Qostanaı aýdanynda 26 kásipker jylyjaı sharýashylyǵynyń qyr-syryn meńgerip shyqqan.
«Kásipker áıelderdi qoldaý ortalyǵy» baǵyty aıasynda 400-ge jýyq azamatsha bıznes júrgizýge qatysty keńes alǵan. О́ńirde kásipkerlikpen aınalysatyn áıelder jyl sanap kóbeıip kele jatqany baıqalady. Mysaly, 2023 jyly bızneske bet burǵan qyz-kelinshekterdiń sany 26 474 bolsa, jyl sońyna qaraı bul kórsetkish 28 myń 305-ke jetken. Bıyl «Atameken» UP fılıaly Qostanaıdaǵy kásipker áıelder shyǵaryp jatqan ónimderdiń aýqymdy kórmesin uıymdastyrýdy kózdep otyr. Oǵan kem degende 120 kásipker qatysady dep kútilýde.
Qostanaı oblysy