Búgin «Barmysyń, baýyrym» habarynyń tikeleı efırinde Belgııa azamattary asyrap alǵan Jánibektiń isine qatysty tyń aqparat aıtyldy. Radıo-habar júrgizýshisi Qymbat Dosjan sol eldiń elshiligine joldaǵan saýalyna jaýap kelgenin habarlady, dep jazady Egemen.kz.
«Barmysyń, baýyrym» redaksııasy Qazaqstannyń Belgııadaǵy elshiligine 2 saýalmen júgingen.
1. «Jánibek Jumaǵulovty asyrap alǵan belgııalyq kelinshektiń esebi nege túgel emes?».
2. «Jánibek Jumaǵulovty asyrap alǵan shetel azamaty birneshe ret medısınalyq emdeý mekemesine jatqyzylǵan. Sol jyldary Qazaqstannyń Belgııadaǵy elshiligi, Qazaqstannyń Syrtqy ister mınıstrligi balanyń jaǵdaıynan habardar bolǵan ba? Eger memlekettik organdar habardar bolsa, qandaı sheshim qabyldandy?».
Jýrnalıster joldaǵan suraqqa Belgııadaǵy Qazaqstannyń Tótenshe jáne О́kiletti elshisi Marǵulan Baımuhan jaýap bergen.
«Jánibek Jumaǵulov Belgııadaǵy elshilikke kómek surap habarlaspaǵan. Sondaı-aq Eddı Jan Savelevti asyrap alý prosesi bala asyraý agenttikteriniń qatysýynsyz júzege asyrylǵan. Iаǵnı, Jánibekti asyrap alý prosesi jeke, tikeleı boldy. Sondaı-aq elshi Belgııadaǵy bala asyrap alý ortalyǵynyń ókili bala kámelet jasyna tolǵandyqtan qandaı da bir esepterdi, aqparatty suraýǵa nemese osyǵan baılanysty odan ári basqa qadamdar jasaýǵa quqy joq dep jaýap bergenin aıtqan», dedi Qymbat Dosjan.
Qymbat Dosjannyń aıtýynsha, Jánibektiń Qazaqstannyń Belgııadaǵy elshiligine kómek surap habarlaspaǵanyna onyń 16 jasqa tolǵanda asyrap alǵan anasynan bólek turǵany sebep bolǵan. Al kámelet jasyna jetkende Jánibek Ispanııaǵa kóship ketken edi.