Qýyrshaq teatry – kishkentaı baldyrǵandardy ǵana emes, eresekterge de ǵajaıyp ertegi áleminiń sıqyrly syryn tanytyp, jaqsylyqqa, adamgershilikke, shynaıylyqqa shaqyratyn móldir meken. Ertegiler eline sapar shegip, teatr qoıylymdaryn tamashalaǵan árbir kórermen kóńili qýanyshqa bólenip, ózgeshe áser alýy úshin Almaty Memlekettik qýyrshaq teatry birqatar irgeli isterdi júzege asyryp jatyr. Osy oraıda, jýyrda Almaty qalasy ákimdiginiń qoldaýymen teatr ǵımaratyna kúrdeli jóndeý jumystary júrgizildi.
Almaty Memlekettik qýyrshaq teatry araǵa 10 jyl salyp, qaıta jańǵyrdy. Álemdik teatr sahnasyn zamanaýı baǵyttar jaýlap jatqan qazirgi ýaqytta qýyrshaq teatryna kúrdeli jóndeý jumystaryn júrgizý, árıne, eń aldymen zaman talaby.
Qazirgi tańda kórermen zaldary qoıylymdardyń sapasyn arttyryp, mamandardyń qolaıly jumys jasaýyna yńǵaıly sońǵy úlgidegi zamanaýı daýys, jaryq, sahna jabdyqtarymen jańaryp, teatr foıesi kórermenderge jaıly atmosfera syılaıtyn jańashyl dızaınmen kórkemdelip, túrli úlgidegi qýyrshaq túrleri, qoıylym eskızderimen bezendirilse, ǵımarattyń ishki ıntereri, syrtqy fasady kórermen suranysyna saı jasaqtaldy.
Kórermenderdiń qoıylym tamashalaý barysynda jaıly demalýyna jaǵdaı jasaıtyn yńǵaıly, jumsaq oryndyqtar, joǵary talǵamdy ishki dızaın jáne qoıylym barysyndaǵy jaryq pen dybys qurylǵylarynyń sapasy qýyrshaq teatryna degen suranystyń artýyna óz septigin tıgizeri anyq.
Jańa úlgide jabdyqtalǵan teatr – shyǵarmashylyq jáne tehnıkalyq bólim qyzmetkerlerine jańa tynys, tyń ıdeıalar, jumysqa degen erekshe kózqaras, shalqar shabyt, jańa jobalarǵa degen qyzyǵýshylyq syılap qana qoımaı, kásibı bilikti mamandardyń teatrda jumys isteý suranysynyń artýyna yqpaly zor.
Baldyrǵandar qııalyna qanat bitirip, jaqsylyqqa jeteleıtin ónerdiń alǵashqy mektebi – qýyrshaq teatry jańa jyldy jańa ǵımaratta, jańa jobalarmen qýan- týǵa daıyn. Aldaǵy ýakytta súıikti kórermendermen qaýyshýǵa asyq teatr ujymy búldirshinderge arnalǵan tanymdyq, tárbıelik máni zor, batyldyq pen ójettilikke úndeıtin «Etik kıgen mysyq», jasóspirimderge arnalǵan fılosofııalyq tereń astarǵa ıe «Shapan» qoıylymdarynyń premeralaryn usynbaq.