Keńes áskerleriniń Aýǵanstannan shyǵarylǵanyna 35 jyl tolýy qarsańynda Shymkent qalasyndaǵy «Ońtústik» óńirlik qolbasshylyǵynyń mehanıkalandyrylǵan brıgadasynyń sarbazdarymen dástúrli kezdesý ótti. Kezdesý Aýǵan soǵysyna qatysqan sarbazdar men ofıserlerdiń erlikterin este saqtap, óskeleń urpaqty patrıottyq, Otanǵa degen súıispenshilik rýhynda tárbıeleý maqsatynda uıymdastyryldy.
Áskerı qyzmet – boryshyn óteý úshin ǵana emes, sonymen birge elimiz ben onyń azamattary aldyndaǵy jaýapkershilik ekenin aıqyn kórsetedi. Mundaı kezdesýler arqasynda naǵyz erlik pen qaharmandyqtyń tiri úlgilerin kórgen sarbazdardyń qyzmetine jaǵymdy áser etedi.
Sarbazdarmen kezdesip, olardyń qyzmet etý jaǵdaıymen tanysýǵa ınternasıonaldyq boryshyn ótep, túrli áskerı quramalarda qyzmetin jalǵastyrǵan Aýǵan ardagerleri zapastaǵy polkovnık Erbol Málikov pen zapastaǵy podpolkovnık Nurbek Júnisbekov keldi. Olardy qarýlas baýyrlary Qarýly Kúshterdiń ardagerleri, otstavkadaǵy polkovnık Serikbaı Ońbaev, zapastaǵy polkovnık Talǵat Kenjebaev jáne Reıimbaı Halmuratov qoldap, birge júrdi. Ár qonaqtyń tájirıbesi mol jáne Qazaqstannyń qorǵanys qabileti men áskerı qaýipsizdigin nyǵaıtýǵa qosqan úlesi zor.
Brıgada komandıriniń tárbıe jónindegi orynbasary, podpolkovnık Rınat Qalıdoldın atap ótkendeı, aýǵan ardagerlerimen kezdesý árbir sarbaz úshin erekshe boldy. Olar aǵa býynnan áskerde júrip basynan ótken synaqtar men qyzyqty oqıǵalary týraly áńgimelerin tyńdady.
«Ardagerler qyzmeti, ata-analarǵa jazǵan hattary, elge oralýlary, áskerde júrip alǵan ómirlik sabaq týraly estelikterimen bólisti. Tarıhı oqıǵalardy este saqtaý úshin mundaı kezdesýlerdiń mańyzy zor. Internasıonalıst-jaýyngerler tarıhtyń tiri kýágerleri jáne olardyń áńgimeleri jastarǵa beıbitshiliktiń qundylyǵyn shynaıy baǵalaýǵa kómektesedi. Soǵys ardagerlerimen kezdesý olardyń áńgimelerin tyńdaý ǵana emes, sonymen birge elimizdiń kemel, myqty, sanaly azamaty bolyp qalyptasýymyzǵa múmkindik beredi», dep qosty Rınat Qaısaǵalıuly.
Sońynda áskerı bólim basshylyǵy kezdesýge qatysqan ardagerlerge rızashylyǵyn bildirip, estelik syılyqtar tabys etti.