Ekibastuz qalasy mańynda ertegilerdegideı muzdyq paıda boldy. Ishinde kádimgideı úńgiri bar tańǵajaıyp muz nysany jaqyn jerdegi sý qubyrynyń jarylýynan túzilgeni anyqtaldy.
Bul jaıynda eń áýeli tanymal jýrnalıst Ashat Nııazovtyń Instagram-daǵy paraqshasynan kórdik. Tehnogendik apattan paıda bolǵan muzdyq qalaǵa qaraı ótetin úlken sý magıstrali boıynda tur.
«Muzdyq Ekibastuzdaǵy apattan soń paıda bolǵan tárizdi. Bul jerde qanshama sý aqqanyn elestetýdiń ózi qıyn, jaryq qubyrlardan sý áli de aǵyp jatyr. Jýyq ýaqytta ol erı bastaıdy, sondyqtan oǵan jaqyndaý qaýipti bolar. Eger ony kórseńizder, ishine kirmeńizder. Syrtynan qaraǵanda da ol ádemi» dep jazdy ol paraqshasynda.
Oıda-joqta elsiz dalada paıda bolǵan «tańǵajaıyp kompozısııa» jóninde Ekibastuz qalasy ákimdiginen suradyq. Belgili bolǵandaı, ol aýyzsý qubyry boıyndaǵy jaryqtan aqqan sýdan túzilipti.
– Leshoz aýdany mańyndaǵy bul qubyr «Gorvodokanal» mekemesiniń balansynda tur. Qysta bul jerde iri apat oryn alyp, aıazdyń saldarynan álgindeı muzdyq paıda bolǵan. Qubyrdaǵy jaryq jamalyp, qalpyna keltirildi. Bıyl aýmaqtaǵy magıstraldyq sý qubyryn rekonstrýksııalaý josparlanǵan. Aldaǵy ýaqytta mundaı zalaldar paıda bolsa, birden qalpyna keltiriledi, – dep habarlady Ekibastuz qalalyq ákimdiginiń baspasóz qyzmeti.
Atalǵan ýchaskeni jóndeıtin merdiger qazirden tańdalyp qoıǵan, kún jylyna iske kirispek.
Shahar turǵyndary men muzdyqty kórgen adamdar álgi jerde kóp mólsherde sý tógilgeni anyq dep otyr. Sýdyń únemsiz jaǵdaıda dalaǵa aǵyp ketken shyǵynyn tutynýshylardan óndirip almaı ma degen kúdik te bar jurttyń boıynda. Al sýmen qamtý mekemesi aldaǵy ýaqytta tarıfte eshqandaı ózgeris bolmaıdy dep sendirip otyr.
2022 jyldyń qarasha aıynda qalanyń jylý júıesinde keshendi apat bolǵanda mundaı muzdyqtar qalanyń ár jerinde paıda bolǵan edi.
Pavlodar oblysy,
Ekibastuz qalasy