Kerekýdegi aqparat salasynyń minberine aınalǵan oblystyq «Saryarqa samaly» gazetiniń shyǵa bastaǵanyna 15 aqpan kúni 95 jyl toldy. Torqaly toqsan bes jylda basylym qashanda halyqtyń muńyn muńdap, joǵyn joqtaýshy, qoǵam ómiriniń aınasy bola bildi. El-jurt basynan ótkergen qıyn-qystaý kúnderdiń, qýanyshty únderdiń kýásine, jaqsylyqtyń jarshysy, ıgi isterdiń bastaýshysyna aınaldy.
«Saryarqa samaly» gazeti eń alǵash ret 1929 jyly 15 aqpanda «Keńes týy» degen ataýmen jaryq kórgen. Basylymnyń negizin ǵulama ǵalym, ádebıettanýshy Beısenbaı Kenjebaev syndy tulǵalar qalap, tuńǵysh redaktory boldy. Alǵash arab árpimen, keıin latynsha grafıkamen jaryq kórgen. Alǵashqy nómirine Beısenbaı Kenjebaev, Ámirǵalı Epmaǵambetov jáne Kárim Ájibekov qol qoıǵan.
1930-1940-jyldary redaksııanyń damýyna Áýbákir Aıapbergenov, Baltabek Asanov, Jumat Dosqaraev, Ábilqaıyr Baımoldın, aǵaıyndy Saǵynbaı, Zeıin Shashkınder, Zikirııa Abdýllın, Sultan Lepesov jáne taǵy da basqa jerles qalamgerlerimiz zor úlesin qosty.
О́ńirlik gazette kóptegen belgili tulǵalar qyzmet etti. Bulardyń arasynda Qazaqstannyń Halyq jazýshysy, áıgili «Mahabbat qyzyq, mol jyldar», «Aqıqat pen ańyz» kitaptarynyń avtory Ázilhan Nurshaıyqovqa erekshe toqtalýǵa bolady. Ázilhan aǵa 1953-1956 jyldar aralyǵynda «Qyzyl tý» gazetine redaktorlyq etken. Ol bul týraly óz esteliginde: «Pavlodar jeri meni ádebıet álemine kótergen kosmodromym» dep jazyp ketken.
Keıingi tolqynmen aqyn-jazýshylar Qalmuqan Isabaev, Qalıjan Bekhojın, Qabdykárim Ydyrysov, Ramazan Toqtarov jáne ózge de qalamgerler basylymmen shyǵarmashylyq baılanysta bolǵan, tyrnaqaldy óleńderi jarııalanǵan. Redaksııada sondaı-aq aqyn Esentaı Erbotın, qalamger Meıram Asylǵazındar eńbek etti.
Gazet óz tarıhynda úsh márte ataý aýystyrǵan. Keńes týynan soń 1930 jyly «Kolhoz», keıinirek «Qyzyl tý», al 1991 jyldan «Saryarqa samaly» atandy. Aımaqtaǵy aǵa basylymnyń jańa belesti jolǵa túsip, serpindi qadam bastaıtyn shaǵy Táýelsizdiktiń týy tigilgen 1991 jyldyń sońǵy aılarymen ushtasyp jatyr. Osy kezeńde ýaqyt talabyna saı shuǵyl túrde gazet ataýyn ózgertý mindeti alǵa qoıyldy. Kóterilgen máselege oblystaǵy barlyq qoǵamdyq uıymnan bastap, qatardaǵy qarapaıym oqyrmanǵa deıin óz únderin qosty. 1991 jyldyń 26 qyrkúıeginde oblystyq basylymda jańa dáýir bastaldy. Osy kúni gazettiń kezekti nómiri «Saryarqa samaly» degen ataýmen jarq etip shyǵa keldi. Bas redaktor Á.Muhamedjanov oqyrmandarǵa arnap «Izgilik – únimiz, ádilet – týymyz» degen arnaıy maqala joldap, gazet árdaıym jurtshylyqqa arqa súıeıtinin, bul bastama da sonyń negizinde ómirge kelgenin sóz etedi. Tarıhtyń jańa bir paraǵy ashyldy. Ulttyq únparaq óńir jurtshylyǵy úshin kez kelgen qoǵamdyq máseleni talqylaýǵa arnalǵan minberge aınaldy.
Ulttyq rýhanı baǵdarsham bolý maqsaty keleli oılarǵa jetelep, gazet betterinde jańa aıdarlar ashyla bastady. Al araǵa eki jarym aı ýaqyt salyp, Qazaqstan óz Táýelsizdigin jarııalaǵanda oblystyq únparaqtyń abyroıy odan ári arta tústi. Sebebi, jurttyń azattyqtyń dámin erte sezinýine, rýhanı turǵydan serpilýine basylym ataýynyń erterek ózgergendigi mańyzdy ról atqarǵany aıdan anyq edi.
Gazette 90-shy jyldary jumys istegen aǵa býyn jýrnalıster Ájibek Júsipov, Muhamedjan Dáýrenbekov, Aıtjan Bádelhan, Tóleýbek Qońyrov, Qajymurat Smaǵulov, Tursynbaı Ibadýllın, Baqyt Baımuratov, О́skenbaı Tastemhanov, Ǵalymbek Jumatov, Sholpan Baıǵaly, Farıda Byqaı, Sosıal Áıtenov, Múbárak Jamanbalınov, Arman Qanı, Nurtóre Júsip, Ǵalym Omarhan jáne basqalarynyń sol tustaǵy shyǵarmashylyq izdenisteri men bastamashyl oılary oqyrman qaýymǵa jaqsy tanys. Kóp qıyndyqqa qaramastan jýrnalıster qalamdaryn ushtap, el ómirinen tereńnen syr sherte aldy. Halyqty serpiltip, jaqsylyqtyń nuryn septi.
Beısenbaı Kenjebaevtan keıin gazetke ár jyldary Ǵalym Maldybaev, Hamza Syzdyqov, jazýshy Ázilhan Nurshaıyqov, Omarǵalı Qudyshev, Subyhan Shoshanov, Baltabaı Seısenbekov, Álqoja Muhamedjanov, Muhıt Omarov, Asyl Ábishev redaktorlyq etti. Redaksııa ujymyna búginde aımaǵymyzǵa tanymal qalamger Nurbol Jaıyqbaev basshylyq etip otyr.
Basylymnyń taralymy 2014-2015 jyldary 50 myń danaǵa deıin ósken ýaqyty bolǵan. Bul jetistigi úshin 2014 jyly ujym Qazaqstan Jýrnalıster akademııasynyń jalpyulttyq syılyǵy «Altyn juldyz» dıplomymen marapattalsa, al 2022 jyly «Úrker» jalpyulttyq syılyǵyn «Úzdik óńirlik BAQ» atalymynda jeńip aldy.
Pavlodar oblysy