Tanymal ánshi Roza Rymbaevanyń uly, ánshi ári mýzykant Álı Oqapov «Meniń ómirim» baǵdarlamasyna qonaq bolyp, ótken ómiri týraly sóz qozǵady, dep habarlaıdy Egemen.kz.
Ol áńgime arasynda óz teginiń nelikten úsh ret aýysqanyn túsindirdi. Juldyzdy shańyraqtyń otaǵasy ómirden ótken soń, anasy men balalary qıyn kezeńderdi bastan ótkergen.
- Barlyǵyn ashyp aıta almaımyn, biraq otbasymyzǵa qaýip tóngen jaǵdaılar da ótti. Soǵan baılanysty tegimdi úsh ret aýystyrǵam. Negizi Oqapov bop týylǵam, keıin Tasqynuly boldym. Sosyn Rymbaev dep ózgerttim. Keıin, 16 jasqa kelgende alǵashqy tólqujatymdy alarda «Mama, endi bári tynyshtalǵan sııaqty, biz úshin eshteńe qaýipti emes sııaqty. Qalaı qaraısyń, men negizi Oqapovpyn ǵoı, túrim de, minezim de ákeme tartqan. Sen qarsy bolmasań, qujatymdy qaıtadan Oqapov dep ózgertip alsam» dep edim. Anam qarsy bolǵan joq, «árıne, óziń shesh» dep aıtty. Anam árqashan bizge erkindik beredi. Al Mádı ol kezde kishkentaı, «onda Mádı Rymbaev bolyp qala bersin» dedi, deıdi Álı Oqapov.
Sondaı-aq óner ıesi otbasyna qaýip tóndirgen jaǵdaıdy ashyp aıtýdan bas tartty.
- Sebebin aıta almaımyn, ótken nárse ótti. Biz aman-esenbiz, arty jaqsy boldy, bastysy – sol. Qazir endi arada kóp ýaqyt ótip ketti ǵoı. Keı kezderi «osy shynymen boldy ma, bolmady ma» dep senbeı, oılanyp qalam, - dedi ánshi.